ՀՀԿ-ի եւ ԲՀԿ-ի միջեւ օրեցօր աճող լարվածությունը մեծացրել էր բախումների ու արյունահեղության հավանականությունը: Այս մասին այսօր՝ փետրվարի 24-ին, ԱԺ հայտարարությունների ժամին ասաց ԱԺ ՀՅԴ խմբակցության ղեկավար Արմեն Ռուստամյանը:
Նրա խոսքով՝ հարցերը դեռեւս մնում են չլուծված, ինչը նշանակում է՝ բոլորս ենք պարտված:
«Մեր երկրի ապագայի համար պատասխանատու բոլոր քաղաքական ուժերը պարտավոր են անմիջապես ձեռնամուխ լինել անկեղծ քննարկումների միջոցով գտնելու կուտակված բարդագույն խնդիրների լուծման ճանապարհը: Դրա համար ենք առաջարկում փոխել թե ընտրական, թե կառավարման համակարգերը Հայաստանում: Որովհետեւ առանց մեկի մյուսը թերի է եւ չի ապահովում ժողովրդավարական միջավայր»,- ասաց Արմեն Ռուստամյանը:
Արմեն Ռուստամյանը կարծում է, որ պետք չէ անձնավորել քաղաքական պայքարը, չարիք ծնողը գործող համակարգն է, որն էլ պետք է փոխել:
«Ուստի մեր կոչն է՝ եկեք միասին խելք խելքի տանք ու ազատվենք չարիք դարձած այս արատավոր համակարգից, դուրս գանք այս կեղծ շրջանից եւ լիարժեք փոփոխությունների համար իրական երաշխիքներ ստեղծենք»,- ավելացրեց ՀՅԴ խմբակցության ղեկավարը:
