Մինչեւ ապրիլի 24-ը «Մեծ եղեռնի» 100-րդ տարելիցի խորհրդանիշ համարվող անմոռուկ կամ «Կյանքի ծաղիկ» գնելով յուրաքանչյուր ոք կարող է ֆինանսական օգնություն տրամադրել վերարտադրողական խնդիրներ ունեցող զույգերին: Այսօր՝ փետրվարի 25-ին մեկնարկած՝ «Արագիլ» վերարտադրողական բժշկության աջակցության հիմնադրամի «Կյանքի ծաղիկ» խորագրով ակցիայի խորհուրդը Եղեռնի 1.5 մեկուկես միլիոն զոհերի վերածնունդն է:

«Ես մեծացել եմ Թբիլիսիում, ապրել եմ Հայաստանից դուրս, շատ եմ կարեւորում Հայաստանին ու հայ ժողովրդին ավելի լավ ապագայով ապահովելու  հետ կապված յուրաքանչյուր քայլ: Ինքս էլ մի պահ կանգնել եմ նման փորձության առջեւ, երբ բժիշկներն ինձ ասացին, որ հնարավոր է՝ երեխա չկարողանամ ունենալ: Սակայն այսօր ես երեք երեխա ունեմ: Իսկ վերարտադրողական խնդիրների դեմ պայքարելն այսօր բավական դժվար է ֆինանսական առումով, եթե կան այդպիսի ընտանիքներ, որոնք ցանկանում են երեխաներ ունենալ, պետք է անպայման փորձենք օգնել նրանց»,- NEWS.am-ի հետ զրույցում ասաց ակցիայի հեղինակ-ղեկավար Քրիստինա Հարությունյանը։

Ակցիային կարող են մասնակցել անհատներ եւ կազմակերպություններ ինչպես Հայաստանից, այնպես էլ Սփյուռքից: Ակցիայի մեսիջը միասնականությամբ խնդիրների դեմ պայքարելն է. «Այս տարին ողբերգական նորություններով սկսվեց: Ես ուզում եմ հասարակությանը հասցնել այն ուղերձը, որ պետք է ոչ միայն սգալ, այլեւ միանալ, պայքարել վերածնվելու համար»:

Ակցիային մասնակցելու համար անհրաժեշտ է այցելել flowersoflife.am կայքը եւ գնել 500 դրամ արժողությամբ «կյանքի ծաղիկը»: Հավաքված գումարը կփոխանցվի «Արագիլ» վերարտադրողական բժշկության աջակցության հիմնադրամին: 1.5 միլիոն մարդու մասնակցության դեպքում հնարավոր կլինի օգնել 6000 զույգի:

Մինչեւ հիմա ակցիայի շրջանակում 4020 ծաղիկ է վաճառվել, որով հնարավոր է օգնել երկու զույգի: