Իրավական տեսանկյունից, ԲՀԿ առաջնորդ Գագիկ Ծառուկյանի բացակայությունները ԱԺ նիստերից չի կարելի անվանել հարգելի: Այս մասին, այսօր՝ փետրվարի 25-ին, ԱԺ-ում լրագրողների հետ զրույցում նշել է խորհրդարանի նախագահ Գալուստ Սահակյանը: Նա հավելել է, որ ԱԺ ղեկավարությունը դեռեւս հանդես չի գալիս գնահատականներով եւ սպասում է Ծառուկյանի լրացուցիչ պարզաբանումներին:
«Մենք պարոն Ծառուկյանին նամակ ենք հղել՝ խնդրելով հիմնավորված պատասխանել այդ հարցերին: Բայց ես չէի ցանկանա նման նախադեպ լիներ, որովհետեւ այն կարող է օրինակ լինել մնացածի համար»,-հայտարարել է Սահակյանը:
Հարցին՝ իր կարծիքը հայտնե՞լ է ՀՀԿ ղեկավար, երկրի նախագահ Սերժ Սարգսյանին, Գալուստ Սահակյանը պատասխանել է. «Ես կարծում եմ, որ նման հարցերին պետք է հետեւից նախագահի արձագանքը: Մյուս կողմից, ես դեռ որոշում չեմ կայացրել»:
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։
Մեկ օր անց Ծառուկյանը հանդես եկավ հայտարարությամբ՝ նշելով, որ իրենք գնում են իշխանափոխության: Սակայն փետրվարի 17-ին տեղի ունեցած Սարգսյան-Ծառուկյան հանդիպումից հետո ԲՀԿ առաջնորդը նորից հայտարարությամբ հանդես եկավ՝ նշելով, որ հանրահավաքը չեղյալ է համարվում:
