Թուրքիայի ԱԳ նախարար Մեւլութ Չավուշօղլուն Բաքվում հայտարարել է, ամբողջ աշխարհն էլ գիտի, որ Թուրքիան նախապայման է դրել Հայաստանի հետ հարաբերությունները կարգավորելու համար։
Թուրքական Anadolu գործակալության փոխանցմամբ՝ Բաքվում իր գործընկերոջ հետ հանդիպումից հետո Թուրքիայի ԱԳ նախարար Մեւլութ Չավուշօղլուն Հայաստանի նախագահի կողմից արձանագրությունները հետ կանչելու հետ կապված հարցին պատասխանել է. «Հայկական իշխանությունները Թուրքիա-Հայաստան հարաբերությունները կարգավորող արձանագրությունները տարան Սահմանադրական դատարան, որտեղ դատարկվեց դրանց պարունակությունը։ Հայաստանը չկարողացավ անցնել անկեղծության քննությունը։ Տեսնում ենք, որ հարեւանների հետ հետին մտքերով է։
Դե մենք էլ նախապայման ունեինք արձանագրությունների վավերացման համար։ Հայաստանը պետք է հետ քաշվեր «ադրբեջանական գրավյալ» հողերից։ Իհարկե, առանց այդ պայմանը կատարելու խոսք չէր կարող լինել, որ մենք վավերացնեինք։ Այդ նախապայմանն ամբողջ աշխարհը գիտեր»,-ասել է Չավուշօղլուն։
