Կաշառք վերցնելու մեջ մեղադրվող՝ Նոր Նորքի զինկոմ Ռաֆայել Զախարյանի համար դատախազը պահանջել է 9 տարվա ազատազրկում: Այս մասին NEWS.am-ին ասաց ամբաստանյալի փաստաբան Արմեն Խաչատրյանը:

«Դատաքննությունը փետրվարի 23-ին ավարտվեց, մեղադրող կողմն ասաց իր ճառը՝ պահանջելով 9 տարվա ազատազրկում: Մենք բնականաբար դրա հետ համաձայն չենք, բայց ունենք այն, ինչ ունենք: Տեսնենք՝ դատարանը ինչ որոշում կկայացնի»,- ասաց փաստաբանը:

Նա հայտնեց, որ հաջորդ դատական նիստը նշանակված է մարտի 11-ին, որի ժամանակ էլ ինքը կներկայացնի պաշտպանական ճառը:

Նշենք, որ ըստ մեղադրական եզրակացության՝ Ռաֆայել Զախարյանը 2014թ. մարտի 17-ին իր աշխատասենյակում, Երեւան քաղաքի Ավան 7 փող. 45 տան բնակիչ Գագիկ Վարդանյանից, որդու՝ Ալբերտ Վարդանյանի օգտին առողջական վիճակի բերումով պահեստազորում հաշվառելու, դրանով իսկ զինվորական ծառայության զորակոչից վերջնականապես ազատելու դիմաց պահանջել է առանձնապես խոշոր չափերով՝ 1.659.840 ՀՀ դրամին համարժեք 4000 ԱՄՆ դոլար կաշառք: Երկու օր անց Զախարյանը նույն զինկոմիսարիատի զորակոչային բաժանմունքի պետի աշխատասենյակում Գ.Վարդանյանից ստացել է 3900 ԱՄՆ դոլար:

Ռաֆայել Զախարյանին մեղադրանք է առաջադրվել Քրեական օրենսգրքի 311-րդ հոդվածի 4-րդ մասի 2-րդ կետով եւ 235-րդ հոդվածի 1-ին մասով:

Հիշեցնենք, որ կալանավորված Նոր-Նորքի զինվորական կոմիսար, գնդապետ Ռաֆայել Ռուբենի Զախարյանը Գարիկ Գաբրիելյանի՝ Գելի հորաքրոջ որդին է: