Սպանության փորձ կատարելու մեջ մեղադրվող՝ ՀՀԿ-ական նախկին պատգամավոր Ռաֆիկ Պետրոսյանի որդին՝ Մհեր Պետրոսյանը, շարունակում է մնալ կալանավորված: Այս մասին NEWS.am-ի թղթակցի հետ զրույցում ասաց նրա հայրը՝ Ռաֆիկ Պետրոսյանը:
Նա նշեց, որ որդու նկատմամբ ընտրված խափանման միջոց կալանքը չեն բողոքարկել: Նախկին պատգամավորը այլ մանրամասներ չհայտնեց: «Գործը քննում են, երբ կվերջացնեն, կվերջացնեն»,-ասաց նա:
Նշենք, որ Մհեր Պետրոսյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 1-ին մասով եւ 235-րդ հոդվածի 1-ին մասով:
Ըստ Քննչական կոմիտեի՝ Մհեր Պետրոսյանը 2015 թվականի փետրվարի 6-ին գնացել է Պռոշյան 2/1 շենքի նկուղային հարկում գտնվող, Օսեբ Մարկարյանին պատկանող գրասենյակ։
Վերջինիս հետ ունեցած պարտքուպահանջի հարցի շուրջ գրասենյակում առաջացել է վիճաբանություն, որի ժամանակ, գոտկատեղից հանելով ապօրինաբար իր մոտ կրվող, հրազեն հանդիսացող «ԻԺ-71» մոդելի «ՎԱՐ-7526» տեսակի 9 մմ տրամաչափի ատրճանակը՝ Մ.Պետրոսյանը կրակել է Օ.Մարկարյանի ուղղությամբ։ Վերջինս ստացել է մարմնական վնասվածք, սակայն, ըստ քննության տվյալների, Մ.Պետրոսյանը չի կարողացել հանցագործությունն ավարտին հասցնել՝ իր կամքից անկախ հանգամանքներով. գրասենյակում ներկա գտնվողները վնասազերծել են նրան: