«Իսլամական պետություն» ծայրահեղական խմբավորման զինյալներն Իրաքի հյուսիսում ոչնչացրել են քանդակների եւ արձանների հավաքածուն, որոնք մի քանի հազար տարեկան էին: Ըստ Reuters-ի, կործանված հուշարձանների հստակ թիվը հայտնի չէ:
Ծայրահեղականներից մեկը համացանցում տեսանյութ է հրապարակել, որտեղ երեւում է, թե ինչպես են մուրճով ոչնչացնում արձանները: Դրանց մի մասն ասորական ժամանակաշրջանի՝ մ.թ.ա. VII դարի հուշարձաններ են: Lenta-ի փոխանցմամբ, տեսանյութում զինյալներից մեկը պարզաբանում է, որ դրանք նպաստում են կռապաշտությանը:
«Մարգարեն մեզ պատվիրեց ազատվել արձաններից եւ մասունքներից: Նրա հետեւորդները նույն բանն են արել, երբ երկրներ են նվաճել»,- հայտարարել է զինյալը:
Իսլամականների կողմից գրավված Մոսուլ քաղաքի թանգարանի նախկին աշխատակիցը ենթադրում է, որ հուշարձանները հենց այդ թանգարանին են պատկանում:
