ՅՈՒՆԵՍԿՕ-ի գործադիր տնօրեն Իրինա Բոկովան սուր քննադատության է ենթարկել «Իսլամական պետության» կողմից Իրաքի հյուսիսային Մոսուլ քաղաքում հնագույն հուշարձանների ոչնչացումը։
«Ես խորապես ցնցված եմ այսօր համացանցում հայտնված տեսանյութից, որտեղ երեւում է, թե ինչպես են ոչնչացվում Մոսուլի թանգարանում գտնվող արձաններն ու այլ մշակութային նմուշները։ Ես դատապարտում եմ այդ արարքը՝ իբրեւ Իրաքի հազարամյա պատմության եւ մշակույթի դեմ դիտավորյալ հարձակում եւ բռնության ու ատելության հրարհրում»,- ասված է Բոլովայի հայտարարության մեջ։
Ըստ նրա՝ «Իսլամական պետության» գործողությունները խախտում են ՄԱԿ Անվտանգության խորհրդի վերջերս ընդունած բանաձեւը, որը դատապարտում է մշակութային ժառանգության ոչնչացումն ու կանխարգելիչ միջոցներ է ձեռնարկում Սիրիայի եւ Իրաքի հնությունների ու մշակութային կոթողների ապօրինի վաճառքը կանխելու ուղղությամբ, փոխանցում է BBC ռուսական ծառայությունը։
Բոկովայի հավաստմամբ՝ ինքն արդեն դիմել է Անվտանգության խորհրդին՝ խնդրելով արտահերթ նիստ գումարել Իրաքի մշակութային ժառանգության պահպան հարցով։
Հիշեցնենք, որ տեսանյութում սեւ հագնված մարդիկ գետին են տապալում արձանները եւ կռանով կոտրում դրանք։ Մասնավորապես նրանք ավերել են մ.թ.ա. 9-րդ դարի ասորական մշակույթին պատկանող թեւավոր ցլի արձանը, որը հայտնաբերվել էր Ասորեստանի մայրաքաղաք Նինվեում։