Վրաստանի իշխանությունները չեն պատրաստվում վերանայել կամ փոփոխություններ մտցնել Ռուսաստանի հետ հարաբերությունների կարգավորման հարցերով Վրաստանի վարչապետի հատուկ ներկայացուցիչ Զուրաբ Աբաշիձեի եւ ՌԴ փոխարտգործնախարար Գրիգորի Կարասինի հանդիպումների ձեւաչափում։ Այս մասին լրագրողներին հայտարարել է Վրաստանի վարչապետ Իրակլի Ղարիբաշվիլին։
Աբաշիձեի եւ Կարասինի միջեւ բանակցությունների վերջին փուլը տեղի էր ունեցել չորեքշաբթի Պրահայում։
«Աբաշիձե-Կարասին հանդիպումների ձեւաչափը գործում է արդեն 2 տարի։ Այն բավականին հաջողված ձեւաչափ է, եւ այս փուլում մենք չենք պատրաստվում այն վերանայել կամ փոփոխություններ մտցնել դրանում»,- մեջբերում է Ղարիբաշվիլիի հայտարարությունը «Նովոստի Գրուզիա»-ն։
Հիշեցնենք, որ Վրաստանի եւ Ռուսաստանի կառավարությունները 2011թ. նոյեմբերի 9-ին Ժնեւում ապրանքաշրջանառության եւ մաքսային վարչարարության մոնիտորիգի մեխանիզմների հիմնարար սկզբունքների մասին երկկողմ համաձայնագիր էին ստորագրել։
