ՀԱԿ-ը չկարողացավ մեզ մինչեւ վերջ տանել: Այս մասին այսօր՝ մարտի 1-ին, լրագրողներին ասաց «Քաղաքացիական պայմանագիր» նախաձեռնության անդամ Սասուն Միքայելյանը՝ անդրադառնալով2008թ. Մարտի 1-ից հետո ստեղծված իրավիճակին:
«Մենք ՀԱԿ-ի հետ երկար ճանապարհ ենք անցել: ՀԱԿ-ի ղեկավարությունը մեզ մինչեւ վերջ չկարողացավ տանել: Էդքան տանջանքից, տառապանքից, կալանավայրում անցկացնելուց հետո արդյունքի չհասանք: Եվ մենք որոշել ենք նոր ձեւաչափով մեր պայքարը շարունակել»,- ասաց Սասուն Միքայելյանը:
Սասուն Միքայելյանը նաեւ նշեց, որ Գագիկ Ծառուկյանն իր կարծիքով չի կարող ընդդիմություն ձեւավորել եւ այդ առումով նա չի տարբերվում Եռյակի մյուս անդամներից:
Հիշեցնենք, որ 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում: Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին, իսկ նույն օրը երեկոյան իշխանությունները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան: Մինչ օրս 10 զոհերի համար ոչ ոք պատասխանատվություն չի կրել:
