Հեռուստատեսության եւ ռադիոյի ազգային հանձնաժողովը (ՀՌԱՀ) 2010 թվականի հուլիսի 20-ին հայտարարել է Հայաստանի տարածքում թվային հեռարձակման ցանցի միջոցով եթերային հեռարձակում իրականացնելու հեռուստահեռարձակողների լիցենզավորման 18 մրցույթներ։
Մրցույթի հայտարարման օրվանից, այսինքն՝ հուլիսի 20-ից սկսած 83-րդ օրվանից մինչև 93-րդ օրը (հոկտեմբերի 10-20-ը ընկած ժամականահատվածում) մրցույթի մասնակիցները պետք է ներկայացնեն հայտը և անհրաժեշտ փաստաթղթերը:
Սահմանված կարգի համաձայն՝ մասնակիցների ցանկը կհրապարակվի ՀՌԱՀ-ի կայքում` 2010թ. հոկտեմբերի 22-ին։ Lիցենզավորված անձի ընտրությունը տեղի կունենա 2010թ. դեկտեմբերի 16-ին, ժամը 11-ին:
Նշենք, որ այսօր հայտարարվել է թվային հեռարձակմամբ հանրապետական սփռման, ընդհանուր ուղղվածության եթերային հեռարձակում իրականացնելու 5 մրցույթ եւ թվային հեռարձակմամբ հանրապետական սփռման եթերային վերահեռարձակում իրականացնելու 1 մրցույթ։
Երեւանում հեռարձակելու համար հայտարարված մրցույթների թիվը ընդհանուր առմամբ 9 է, որոնցից 3-ը նախատեսվում են եթերային վերահեռարձակում իրականացնելու համար։
Մյուս 6 մրցույթներից 1-ը ընդհանուր ուղղվածության ու տվյալ տարածքի բնակչության հետաքրքրությունները բավարարող հեռարձակում իրականացնելու համար է, մնացած 5-ը՝ թեմատիկ ուղղվածության. ժամանցային, երիտասարդական, երաժշտական, միջազգային եւ տեղական լրատվական-վերլուծական, ինչպես նաեւ մանկապատանեկան, գիտակրթական, դաստիարակչական, ճանաչողական։
Բացի այդ, հայտարարվել է թվային հեռարձակման ցանցի միջոցով մարզային սփռման, ընդհանուր ուղղվածության ու տվյալ տարածքի բնակչության հետաքրքրությունները բավարարող հեռուստահեռարձակողների լիցենզավորման 3 մրցույթ: