Ես ինձ պատիվ չեմ համարում ինչ-որ մեկի թույլ տված արտահայտությանը պատասխանել: Այս մասին NEWS.am-ի թղթակցի հետ զրույցում ասաց ԱԺ «Բարգավաճ Հայաստան» խմբակցության պատգամավոր Ռուբեն Գեւորգյանը («Ծաղիկ Ռուբոն»)՝ մեկնաբանելով իր գործընկեր Աբրահամ Մանուկյանի խոսքերը, թե «Նաիրա Զոհրաբյանը կնիկ է, ի՞նչ հակասություն պիտի ունենան»:
Նա նշեց, որ կան կանայք, որոնք հաճախ կյանքում շատ պատասխանատու հարցերում ավելի կողմնորոշիչ եւ կարեւոր դերակատարում ունեն, քան տղամարդիկ: «ԲՀԿ-ի գործունեության ողջ ժամանակաշրջանը ցույց տվեց, որ Նառան իր կին տեսակով ավելի տղամարդ գտնվեց, քան շալվար հագնող շատ տղամարդիկ»,-ասաց պատգամավորը:
ԱԺ «Բարգավաճ Հայաստան» խմբակցության մեկ այլ պատգամավոր՝ Տիգրան Ուրիխանյանն էլ մեզ հետ զրույցում ասաց, որ ԲՀԿ-ում՝ կուսակցությունում, քաղաքական խորհրդում, խմբակցությունում պիտի տիրի փոխադարձ հարգանքի եւ վստահության մթնոլորտ, յուրաքանչյուր ոք բազմակարծության պայմաններում պետք է ազատ արտահայտի իր կարծիքը եւ դիրքորոշումը, կուսակցության կանոնադրությունը եւ ՀՀ օրենսդրությունն էլ պիտի ընդգրկեն այն շրջանակները, որոնց մեջ այդ գործունեությունը տարածվի, որեւէ այլ բան լինել չի կարող:
«Ես իմ կին գործընկերներին կին եմ անվանում, ոչ թե կնիկ, նրանք եւս ունեն կարծիք արտահայտելու, իրենց կողմից ներկայացվածը քննարկումների օրակարգ մտցնելու հնարավորություն եւ իրավունք: Եւ յուրաքանչյուրի նկատմամբ, այդ թվում՝ կանանց նկատմամբ, պարտավոր են լինել հարգալից, դա միանշանակ կուսակցության քաղաքական թիմի դիրքորոշոմն է, իմ անձնական խոր համոզմունքն է, ես անձամբ թույլ չեմ տալու, որպեսզի այլ ձեւաչափեր լինեն, այլ մթնոլորտ ինձ համար չի կարող լինել»,-ասաց ԲՀԿ-ական պատգամավորը:
Նշենք, որ NEWS.am-ի թղթակիցը զանգահարել էր Աբրահամ Մանուկյանին՝ փորձելով պարզել, թե որքանով են իրականությանը համապատասխանում տեղեկությունները, որ նա լքելու է ԲՀԿ-ն: «Դեռ կորոշեմ, համագումարը թող լինի»,-ասել էր Աբրահամ Մանուկյանը: Նա նշել է, որ մինչեւ համագումարը դա չի լինի, բայց դրանից հետո հնարավոր է դուրս գա ԲՀԿ-ից:
Արդյոք դա պայմանավորված է ԲՀԿ նախագահի ընտրությամբ, նա նշել է, որ դա կասի իր հայտարարության մեջ: Դիտարկմանը, թե հակասություններ ունի՞ ԲՀԿ առաջնորդի հավանական թեկնածու Նաիրա Զոհրաբյանի հետ, պատգամավորն այսպես է պատասխանել. «Ես ընդհանրապես ոչ մեկի հետ հակասություն չունեմ: Նաիրա Զոհրաբյանը կնիկ է, ես ի՞նչ հակասություն պիտի ունենամ»: Կանանց հետ հակասություններ չե՞ն ունենում՝ մեր նկատառմանը նա կարճ է պատասխանել՝ «ոչ»: Նաիրա Զոհրաբյանը մեզ հետ զրույցում ասել էր, որ Աբրահամ Մանուկյանին չի պատասխանելու, նրան կպատասխանեն իր տղամարդ գործընկերները: