Հայաստանում շրջանառության հարկը միանշանակ ապագա ունի։ Այս մասին մարտի 3-ին խորհրդարանում հայտարարել է Հանրապետության խմբակցության ղեկավար Վահրամ Բաղդասարյանը։

Նա շնորհակալություն է հայտնել էկոնոմիկայի նախարարությանը կարճ ժամկետում հարկի վճարման շեմի հիմնավոր հաշվարկների համար։ «Տարեկան 113.4 մլն դրամ շրջանառությունը պատահական թիվ չէ։ Դա այն ծավալն է, որով ձեռներեցը կարող է ընտանիքը ապահովել եւ ինչու ոչ, զարգացնել իր գործունեությունը»,- կարծում է Բաղդասարյանը։

Ըստ նրա՝ պետք չէ թաքցնել, որ հանրապետությունում ապրանքաշրջանառության գրանցման եւ մաքսատներում վերահսկողության հետ կապված խնդիրներ կան։ Ըստ Բաղդասարյանի, երբ որ Հայաստանում բոլոր ապրանքների շրջանառությունը ամբողջովին կվերահսկվի, կարելի կլինի մտածել շրջանառության հարկը ողջ տնտեսության վրա տարածելու մասին։ «Կարծում եմ, մեր տնտեսության նման տնտեսությամբ երկրների մեծ մասի համար սա ճիշտ որոշում է»,- հավելեց Բաղդասարյանը։

Եթե նախկինում առեւտրի սուբյեկտների համար շրջանառությունից հարկը կազմում էր 1%՝ գործարքների պարտադիր փաստաթղթավորմամբ, ապա հիմա դրույքաչափը 1% է՝ փաստաթղթավորված ապրանքների համար եւ 5%՝ «ստվերային»: Ամեն դեպքում, ընդհանուր շրջանառությունից հարկը չի կարող 1.5%-ից ցածր լինել: Բացի այդ, շրջանառության հարկի շեմը 58.35-ից բարձրացվել է մինչեւ 113.4 մլն դրամ։