Լեռնային Ղարաբաղի բնակիչ, 60-ամյա Էդիսոն Ադյանը, որին Երեւանի բնակչ, 35-ամյա Նարինե Նիկողոսյանը մեղադրում է իր նորածնին առեւանգելու մեջ, երեխային ոչ թե գողացել է, այլ, ըստ մոր հետ պայմանավորվածության՝ վերցրել իր խնամակալության տակ: Այս մասին այսօր՝ մարտի 3-ին, NEWS.am-ի հետ զրույցում ասացին Էդիսոն Ադյանի ընկերներ Անդրեյ Դավթյանը եւ Արամայիս Առուստամյանը՝ Նարինեին առաջարկելով հաշտություն կնքել Ադյանների հետ եւ, այդպիսով, երեխային տեսակցելու հնարավորություն ունենալ:
«Մեկ տարեկանից ճանաչում եմ Էդիսոնին, ոչ գող ա, ոչ ավազակ։ Ուղղակի իրենց մեջ պայմանավորվածություն է եղել, էս մարդը էդ աղջկան լավություն ա արել, երեխուն կյանք է տվել: Թող ծննդաբերելուց հետո անմիջապես ասեր, որ երեխուն գողացել են, էն փողոցով անցնող միլիցուն էլ կարելի էր ասել՝ իմ երեխուն գողացան, բայց գնացել ա, հայրություն ա ճանաչել: Էդիսոնն ա էդ երեխուն կյանք տվել, ինքը պետք ա հեռացներ, բժիշկն ու Էդիսոնն են կյանք տվել: Թող հաշտության գան, իրար հետ համերաշխ էդ երեխուն մեծացնեն»,- ասաց Անդրեյ Դավթյանը:
Էդիսոն Ադյանի ընկեր Արամայիս Առուստամյանը NEWS.am-ի հետ զրույցում հավաստիացրեց, որ Էդիսոնն է Նարինեի երեխայի հայրը եւ ընդունակ չէ երեխա գողանալ:
«Էդիսոնը գող չի, Էդիսոնը չի կարող երեխա գողանալ, մեր գյուղը գողացած երեխայի չի ընդունի, ես զրույցից գիտեմ, որ Էդիսոնի երեխան ա: Էդիսոնը պնդում է, որ ինքն ա հայրը: Ասում ա՝ եթե ես չեմ, խի՞ ա ինձ մոտեցել, երեխային հեռացնելու փողն ուզել: Խի՞ ա գնացել Էդոյի եղբոր բնակարանում ամիսներով մնացել»,- ասաց Ադյանի ընկերը:
Արամայիս Առուստամյանի խոսքով՝ երեխան ապահով ձեռքերում է, իսկ բողոքելով՝ Նարինեն Ադյանին ստիպում է Արցախից Երեւան հասնելու համար իր երեխային հատկացվող գումարից ծախսել:
«Երեխեն ապահով ձեռքերում ա, մերն ա ամիսը մի քանի անգամ բողոքում, ծախսեր ա, չէ՞, 400 կմ ամիսը երկու, երեք անգամ գա, ստեղ մի երեք, չորս օր մնա. մերը չի հասկանում, որ էդ իր երեխու ջեբից ա գնում էդ փողը: Կարելի է մի անգամ համաձայնության գալ ոնց որ եղել է առաջ, ու երբ ուզի, գնա երեխուն տեսնի»,- ասաց ընկերոջ «շահերը» ներկայացնող Առուստամյանը:
Հիշեցնենք, որ Նարինե Նիկողոսյանի խոսքով՝ իր ծանոթ բժիշկներից Հրաչ Կալուստյանն իրեն ծանոթացրել է 60-ամյա Էդիսոն Ադյանի հետ, որը ֆինանսական աջակցություն է ցուցաբերել իրեն հղիության ընթացքում՝ ձեռք բերելով կնոջ վստահությունը, իսկ 2013թ. հունիսի 15-ին ծննդատնից գողացել նրա նորածին որդուն։ Կնոջ պատմելով՝ երեխային գողանալուց հետո Հրաչ Կալուստյանն իրեն տարել է նոտարական գրասենյակ եւ խաբեությամբ կորզել ստորագրություն, որով Էդիսոն Ադյանը Արթուրի օրինական հայրն է ճանաչվել: Հրաչ Կալուստյանը Հայաստանից հեռացել է, իսկ Էդիսոն Ադյանը պնդում է, որ ինքը երեխայի կենսաբանական հայրն է։ Նարինեն վստահեցնում է, որ երեխայի հայրը Ադյանը չէ: Նշենք, որ Նարինեն ոստիկանություն է բողոք է ներկայացրել՝ իր երեխային առեւանգելու վերաբերյալ, սակայն քննիչները գործը կարճել են հանցակազմի բացակայության հիմքով։ Նարինեն քննիչների այս որոշումը բողոքարկող հայցով դիմել է դատարան: