Սանկտ Պետերբուրգի ոստիկանությունը ստուգում է շտապ օգնության բժիշկների մասնակցությամբ տեղի ունեցած աննախադեպ միջադեպի փաստերը։

Բազմահարկ շենքի մուտքում տեղադրված տեսախցիկների տեսագրությունը հայտնաբերել էին բնակիչները։ Կադրերում երեւում է, թե ինչպես են ծեծված երիտասարդին օգնելու համար ժամանած բժիշկները նրան քարշ տալիս գետնի  վրայով՝ չնայած այն հանգամանքին, որ շտապ օգնության մեքենայում կան պատգարակներ։ Այնուհետեւ տուժածին տանում են աստիճանների վրայով եւ վայր նետում թաց ասֆալտի վրա։ Երիտասարդը որոշ ժամանակ մնում է այդ վիճակում, իսկ քիչ հետո նրան նույն անփութությամբ տեղավորում են շտապ օգնության մեքենայի մեջ։ Տեսնելով տեսագրությունը՝ հարեւաններն ու տուժածի հարազատները բողոք են ներկայացրել ոստիկանություն։ Այս մասին հայտնում է ՆՏՎ-ն։

Տուժածը պետերբուրգցի Դենիս Կոլպիկովը, որին մուտքի մոտ ծեծել էին անհայտ անձինք։ Հիվանդանոցում երիտասարդը կոմայի մեջ էր հայտնվել, նրա մոտը ախտորոշվել էր ներքին հեմատոմա։ 3 օր անց նրա վիճակը կայունացել էր, եւ տուժածին վերակենդանացման բաժանմունքից տեղափոխել էին պալատ։

Ոստիկանությունը պարզում է, թե շտապ օգնության որ բրիգադն է աշխատել այդ օրը։