«Նուբարաշեն» ՔԿՀ-ի մոտ այսօր՝ մարտի 4-ին, հնչած կրակոցների հետեւանքով 3 հոգու սպանության վայրում մեկ ինքնաձիգ և երկու ատրճանակ է հայտնաբերվել։ Այս մասին հաղորդում է դեպքի վայրում աշխատող NEWS.am-ի թղթակիցը։
Ատրճանակներից մեկը գտել են ՔԿՀ-ի ավտոկայանատեղիում ընկած Մեսրոպ Մելիքյանի մարմնի մոտ։ Դեպքի վայրում շարունակվում են քննչական գործողությունները։
Ավելի վաղ NEWS.am-ը հաղորդել էր, որ կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է Դերո անունով։ Երկուսն էլ մահացել են հիվանդանոցում։ Երրորդ սպանվածը՝ Մեսրոպ Մելիքյանը, մահացել է տեղում։
Հիշեցնենք, որ ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ։ Հիվանդանոցից մեզ հայտնեցին, որ 2 երիտասարդներին իրենց մոտ տեղափոխել են արդեն հրազենային վնասվածքներից մահացած վիճակում։ Նախնական տեղեկություններով մի քանի հոգի կրակ են բացել «Նուբարաշեն» ՔԿՀ-ի մոտ եւ փախուստի դիմել։
Լուսանկարները՝ Արսեն Սարգսյանի/NEWS.am