Երեւանի Նուբարաշեն վարչական շրջանում այսօր՝ մարտի 4-ին, հնչած կրակոցների հետեւանքով մահացած Լեւոն Ղազարյանը՝ «Երրորդմասցի Լյովիկը», Հայաստանի թիավարության ֆեդերացիայի համանախագահն էր: Այս մասին NEWS.am -ի հետ զրույցում ասաց Հայաստանի թիավարության ֆեդերացիայի պատվավոր նախագահ Հրաչիկ Խուդոյանը:
Նրա խոսքով՝ «Երրորդմասցի Լյովիկը» սիրել է զբաղվել թիավարությամբ, հաճախ է այցելել ֆեդերացիա, մասնակցել մարզումներին որպես մարզիչ, ֆինանսապես օգնել է ֆեդերացիային։ Հաշվի առնելով այս ամենը՝ Հրաչիկ Խուդոյանն ինքն է «Երրորդմասցի Լյովիկին» առաջարկել իր փոխարեն զբաղեցնել նախագահի պաշտոնը։
«Ես այդ ժամանակ ֆեդերացիայի նախագահն էի եւ պատրաստվում էի հրաժարական տալ, քանի որ չունեմ այն հնարավորությունները, որ ֆինանսապես օգնեմ ֆեդերացիային: Իսկ Լյովիկն ուներ եւ կարող էր օգնել ֆեդերացիային, մարզիկներին, մարզաձեւին զարգանալ: Նրան դիմեցինք, եւ նա մեծ սիրով համաձայնվեց»,- ասաց Հրաչիկ Խուդոյանը։
Հրաչիկ Խուդոյանի խոսքով՝ «Երրորդմասցի Լյովիկին» իրենք ծանոթացրել են ՀԱՕԿ-ի նախագահության հետ, ներկայացրել են Սպորտի նախարարությանը եւ ֆեդերացիայի նախագահի ընտրություն անցկացրել, ինչի արդյունքում «Երրորդմասցի Լյովիկը» մեկ այլ թեկնածուի հետ ընտրվել է համանախագահ:
Ավելի վաղ NEWS.am-ը հայտնել էր, որ ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ, ճանապարհին նրանք մահացել են։ Նախնական տեղեկություններով՝ մի քանի հոգի կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ:
Կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Մելիքյանը, մահացել է տեղում՝ ՔԿՀ-ի ավտոկայանատեղիում, որտեղ տեղի է ունեցել դեպքը։
Դեպքի առնչությամբ Քննչական կոմիտեում քրեական գործ է հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով: