Հայ ազգային կոնգրեսի առաջնորդ Լեւոն Տեր-Պետրոսյանի համար կարեւոր է պարբերաբար լինել Ազատության հրապարակում: Այս մասին, այսօր՝ մարտի 5-ին, լրագրողների հետ հանդիպման ժամանակ նշել է Միջազգային հարցերի եւ անվտանգության հայկական ինստիտուտի ղեկավար Ստյոպա Սաֆարյանը:
Նրա համոզմամբ՝ այս պահին Հայաստանի ընդդիմադիր դաշտում վակուում է առաջացել: «Ոչ մի ուժ չի զբաղեցնում այդ դաշտը: Լեւոն Տեր-Պետրոսյանը մարտի 1-ի հանրահավաքում պարզապես շտապեց հայտարարել, որ ինքը զբաղեցնում է այդ դաշտը, բայց դա ոչինչ չի նշանակում, առավել եւս, հաշվի առնելով նրա արկածները ոչ իշխանականների ճամբարում: Ոչ ոք նրան չի հավատա»,-ասել է Սաֆարյանը:
Նրա խոսքով՝ քաղաքականության մեջ կարող է բլեֆ լինել, բայց եթե դրան չեն հետեւում քաղաքական բովանդակության իրական քայլեր, որոշ ժամանակ անց բանը հասնում է իմաստազուրկ քայլերին: «Տեր-Պետրոսյանն ընդդիմադիր դաշտում այլեւս չունի ոչ զինակիցներ, ոչ դաշնակիցներ: Նրա առջեւ խնդիր է դրված 2017-ի խորհրդրարանական ընտրություններում հաղթահարել 5-տոկոսանոց շեմը, բայց չեմ կարծում, որ դա նրան կհաջողվի»,-ընդգծել է Ստյոպա Սաֆարյանը:
Փորձագետը նաեւ հավելել , որ վերջին հանրահավաքում ՀԱԿ-ը հերթական անգամ այրեց կամուրջներն այն ուժերի հետ, որոնք կարող էին նրա հետ որոշակի համագործակցության գնալ: