Ամերիկահայ միլիարդատեր Քըրք Քըրքորյանը որոշել է ֆինանսավորել սիրո, մահվան եւ 1915 թվականի Հայոց ցեղասպանության մասին ֆիլմի ստեղծումը: Այս մասին NEWS.am-ի Վաշինգտոնի թղթակցին տեղեկացրել է նախագածի մամուլի քարտուղարը, որը չի ցանկացել հրապարակել անունը:
Նրա խոսքով, ֆիլմը լինելու է 1915 թվականի Հայոց ցեղասպանության ողբերգության ֆոնին մեծ սիրո պատմության մասին: Սյուժեի մանրամասները չեն հաղորդվում:
Ներկայում նախագիծն ընդամենը գաղափարի եւ Քըրք Քըրքորյանի կողմից այն ֆինանսավորելու պատրաստակամության տեսքով է: Պարզվել է՝ գաղափարի էկրանավորման միտք միլիարդատերը վաղուց է ունեցել: Առայժմ պարզ չէ, արդյո՞ք Քըրքորյանը ցանկանում է գլխավոր հերոսի մեջ ինքնակենսագրական որոշ գծեր տեսնել: Սյուժեի կամ դերասանական կազմի ընտրության աշխատանքները դեռեւս չեն սկսվել: Հստակ չէ նաեւ բյուջեի հարցը, սակայն ֆինանսավորման հարցում խնդիրներ չեն լինի:
Աղբյուրի փոխանցմամբ, ժապավենի ստեղծման աշխատանքները կսկսվեն 3-4 ամիս անց, իսկ կես տարի անց ամերիկյան մամուլում «Լաս Վեգասի արքա» անունով հայտնի Քըրք Քըրքորյանը, հավանաբար, հանդես կգա լրատվամիջոցների համար հայտարարությամբ եւ կներկայացնի սյուժեի մանրամասներն ու դերասաններին: