2014 թվականը ռեկորդային էր Beeline-ի համար՝ Հայաստանում բազային կայանների կառուցման թվով։ Այս մասին լրագրողներին մարտի 5-ին հայտարարեց «ԱրմենՏել»-ի (Beeline ապրանքանիշ) գլխավոր տնօրեն Անդրեյ Պյատախինը՝ ներկայացնելով 2014թ. ընկերության արդյունքները։
«Թե որքան ենք կառուցել, այս պահին ասել չեմ կարող, բայց այդ թիվը եռանիշ է։ Կարող եմ ասել, որ այդքան շատ մենք երբեւէ չենք կառուցել»,- նկատել է Պյատախինը։ Նրա խոսքով, ցանցի հնարավորությունները հզորացնել հարկավոր է միշտ եւ տարբեր կերպ։ «Դրա մեջ մտնում են նաեւ 3G ցանցերը, եւ GPRS ազդանշանի ուժեղացուցիչները։ Դա անհրաժեշտ է,օրինակ, նկուղային տարածքներում մեր հաճախորդների կապը բարելավելու համար, որպեսզի կապից օգտվելը հարմնարավետ լինի ամենուրեք։ Բացի այդ, մտածում ենք LTE ցանցի մասին»,- նշել է Պյատախինը։
«ԱրմենՏել»-ը Հայաստանի հեռահաղորդակցման կապի օպերատորներից եւ խոշոր հարկատուներից մեկն է։