Ռոումինգում տվյալների փոխանցումն անջատելու նախազգուշացումը արդիական է մնում։ Այս մասին լրագրողներին մարտի 5-ին հայտարարեց «ԱրմենՏել»-ի (Beeline ապրանքանիշ) գլխավոր տնօրեն Անդրեյ Պյատախինը՝ ներկայացնելով 2014թ. ընկերության արդյունքները։
«Ինտերնետը, այդ թվում՝ անսահմանափակ ինտերնետը, մեզ մոտ այնքան էժան է, որ ՀՀ տարածքում դրա վճարների հետ կապված հաճախորդները բողոքներ չեն ունենում։ Սակայն ցավոք դեպքեր են լինում, երբ ռոումինգում հեռախոսը իրեն տարօրինակ է պահում։ Դրա համար էլ արտասահման մեկնելիս անջատեք հեռախոսի տվյալների փոխանցումը։ Պետք չէ մոռանալ, որ տվյալների միջազգային փոխանցումը բավական թանկ հաճույք է։ Դեպքերը տարբեր են, մենք բոլորին անհատապես ենք մոտենում եւ եւս մեկ անգամ հիշեցնում, որ զգուշությունը չի վնասի»,- նշեց Պյատախինը։
«ԱրմենՏել»-ը Հայաստանի հեռահաղորդակցման կապի օպերատորներից եւ խոշոր հարկատուներից մեկն է։