Կոտայքի մարզի Պռոշյան գյուղում մարտի 3-ին տեղի ունեցած միջադեպի ամբողջ տեսագրությունն առկա է: Այս մասին հայտնեցին NEWS.am-ի աղբյուրները:
Մեր տեղեկություններով՝ գյուղապետարանի տեսախցիկները ֆիքսել են, թե ինչպես է 33-ամյա Արման Թադեւոսյանին մեքենա մոտենում, որի պատուհանից ինչ-որ անձինք մեկ-երկու բառ են ասում, այնուհետեւ կրակոցներ են հնչում: Տեսագրությունն առգրավվել է եւ այժմ որոնում են հանցագործությունը կատարած անձին կամ անձանց:
NEWS.am-ի հետ զրույցում Պռոշյանի գյուղապետ Արթուր Մուրադյանը հայտնեց, որ վիրավորված Արման Թադեւոսյանը մարզիկ է, սակայն, այժմ զբաղվում է բիզնեսով:
«Հումորի մեծ զգացումով, հանգիստ տղա է: Դեպքի մանրամասները չգիտեմ, բայց Արմանը դեռ հիվանդանոցում է, բայց վիճակը նորմալ է»,- ասաց գյուղապետը:
Քննչական կոմիտեի մամուլի ծառայությունից էլ հայտնեցին, որ Արման Թադեւոսյանի վրա կրակած անձին կամ անձանց դեռ չեն գտել:
Նշենք, որ դեպքի առթիվ հարուցվել է քրեական գործ Քրեական օրենսգրքի 34-104-րդ եւ 235-րդ հոդվածների հատկանիշներով:
Ավելի վաղ NEWS.am-ը հայտնել էր, որ մարտի 3-ին ժամը 13:00-ի սահմաններում 23-24 տարեկան մի երիտասարդ Պռոշյան գյուղի կենտրոնում կրակել է 33-ամյա Արման Թադեւոսյանի ուղղությամբ: Նա հրազենային վնասվածքով տեղափոխվել է «Արմենիա» բժշկական կենտրոն:
