Ազգային ժողովում «Բարգավաճ Հայաստան» կուսակցությունից դուրս եկած պատգամավորների մասնակցությամբ գործարար պատգամավորների խումբ ստեղծելու մասին լուրերը առայժմ պաշտոնապես չեն հաստատվում: NEWS.am-ի թղթակցի հետ զրույցում Աժ տեղեկատվության եւ հասարակայնության հետ կապերի վարչության պետ Արսեն Բաբայանը ասաց, որ գործարար պատգամավորների խումբ ստեղծելու մասին որեւէ նախաձեռնություն իրենց հայտնի չէ:
Անդրադառնալով նման խումբ ստեղծելու մասին տեղեկություններին՝ Արագած Ախոյանը նշեց, որ դրանք ուղղակի խոսակցություններ են, հնարավոր է լինի կամ չլինի: ԲՀԿ-ից դուրս եկած մյուս պատգամավորը՝ Հարություն Ղարագյոզյանը (Կարամելի Հարութ), մեզ հետ զրույցում ասաց, որ գործարար պատգամավորների խումբ ստեղծելու մասին ստույգ տեղեկություն չունի:
Ի դեպ, նշենք, որ պատգամավորական խումբ ստեղծելու կարգը սահմանվում է ԱԺ կանոնակարգ օրենքով: Դրա համար անհրաժեշտ է, որպեսզի առնվազն 10 պատգամավորներ դիմեն ԱԺ նախագահին, հայտնեն ղեկավարի, տեղակալի անունները, խմբի անվանումը, այդ մասին ԱԺ նախագահը հայտարարի առաջիկա նիստում: Սակայն, խմբակցության անդամը չի կարող անդամագրվել որեւէ խմբի, ինչը նշանակում է, որ նման խումբ ստեղծելու համար այդ պատգամավորները պետք է դուրս գան ԲՀԿ խմբակցությունից: Իսկ ԲՀԿ խմբակցությունից դուրս գալու դեպքում, եթե նրանք չեն ընտրվել մեծամասնական կարգով կամ համամասնական ցուցակի առաջին 3 հորիզոնականները չեն զբաղեցնում, ուրեմն կկորցնեն իրենց մանդատը:
Հիշեցնենք, որ մարտի 5-ին, տեղի է ունեցել ԲՀԿ արտահերթ համագումարը, որտեղ ԲՀԿ առաջնորդ Գագիկ Ծառուկյանը հայտարարել է ակտիվ քաղաքականությունից հեռանալու մասին: Նա հրաժարվել է կուսակցության ղեկավարի պաշտոնից, հայտարարել է նաեւ ԲՀԿ խմբակցության ղեկավարի պաշտոնից հեռանալու մասին:
Գագիկ Ծառուկյանն առաջարկել ԲՀԿ ղեկավարությունը վստահել Նաիրա Զոհրաբյանին: Վերջինս գրեթե միաձայն ընտրվել է ԲՀԿ վարչության նախագահ: Կուսակցության քաղխորհրդի քարտուղար է ընտրվել քաղաքաշինության նախկին նախարար Վարդան Վարդանյանը:
Վերջին օրերի ընթացքում ԲՀԿ խմբակցության 36 անդամներից կուսակցությունից հեռացել են 7-ը, այս պահին ԲՀԿ խմբակցությունում կա 29 պատգամավոր:
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։ Մեկ օր անց Ծառուկյանը հանդես եկավ հայտարարությամբ՝ նշելով, որ իրենք գնում են իշխանափոխության: Սակայն փետրվարի 17-ին տեղի ունեցած Սարգսյան-Ծառուկյան հանդիպումից հետո ԲՀԿ առաջնորդը նորից հայտարարությամբ հանդես եկավ՝ նշելով, որ հանրահավաքը չեղյալ է համարվում:
