Լոս Անջելեսում փողոցային ավտոմրցարշավի ժամանակ 2 մարդու մահացու վրաերթի ենթարկելու մեջ կասկածվող՝ հայտնի երգչուհի Ֆլորա Մարտիրոսյանի որդուն՝ Հենրի Գեւորգյանին դեռեւս մեղադրանք չեն առաջադրել: Այս մասին NEWS.am-ին հայտնեցին հանգուցյալ երգչուհու հարազատները՝ հերքելով ամերիկյան մամուլի տեղեկությունները, թե Հենրիին մեղադրանք է առաջադրվել:
«Ամսի 11-ին է դատական նիստը լինելու, որի ժամանակ ամեն ինչ կպարզվի: Ամեն դեպքում նա չի կասկածվում սպանության մեջ, քանի որ տեսագրությունն առկա է, այնտեղ պարզ երեւում է, որ Հենրին մեքենայի ղեկին չի եղել: Այժմ Հենրիի միակ մեղքն այն է, որ մեքենան իրեն է պատկանում»,- ասացին հարազտաները:
Նրանց խոսքով՝ իրենք երբեք չեն իմացել, որ Հենրի Գեւորգյանը մասնակցում է նմանատիպ ավտոմրցարշավների:
Նշենք, որ Հենրի Գեւորգյանն ԱՄՆ-ում բնակվում է մորաքրոջ եւ քրոջ հետ:
Ավելի վաղ ամերիկյան ԶԼՄ-ները հայտնել էին, որ Լոս Անջելեսում ապօրինի փողոցային ավտոմրցարշավի ժամանակ 21-ամյա Հենրի Մայքլ Գեւորգյանը, մեկ այլ մեքենայի հետապնդելիս, չի կարողացել կառավարել մեքենան եւ բախվել է մայթին կանգնած մի խումբ անձանց։ Վթարի հետեւանքով մահացել էին երկու երիտասարդ, իսկ մեկն էլ տեղափոխվել է հիվանդանոց: Փետրվարի 28-ի երեկոյան Հենրի Գեւորգյանն ինքնակամ ներկայացել էր ոստիկանություն: Հենրի Գեւորգյանի փաստաբան Քեյթ Հարդին հայտարարել է, որ իր պաշտպանյալը չի եղել վթարի մասնակից Mustang ավտոմեքենայի ղեկին: Նրա խոսքով, մրցարշավի ժամանակ նկարահանված տեսանյութում երեւում է, որ Հենրի Գեւորգյանը մեկնարկի մրցավարն է:
