Լոս Անջելեսում անօրինական ավտոմրցարշավի ժամանակ վրաերթի հետեւանքով երկու մարդու մահվան կապակցությամբ երկրորդ մարդն է ձերբակալվել: «KTLA» հեռուստաալիքի փոխանցմամբ, նրան մեղադրանք է առաջադրվել:
Ձերբակալվել է 38-ամյա Իրաել Վալենսուելան՝ Լոս Անջելեսից: Նրան մեղադրանք է առաջադրվել սպանության եւ ավտոմայրուղում ավտոմրցարշավի մասնակցելու համար, որը հանգեցրել է բախման: Դատարանում Վալենսուելան իրեն մեղավոր չի ճանաչել: Նրան կասկածում են փետրվարի 26-ին կայացած մրցարշավի երկու մեքենաներից մեկի ղեկին լինելու մեջ:
Ավելի վաղ NEWS.am-ը տեղեկացրել էր, որ հանգուցյալ երգչուհի Ֆլորա Մարտիրոսյանի որդին դատական նիստի ժամանակ իրեն մեղավոր չի ճանաչել անցյալ շաբաթ Լոս Անջելեսում անօրինական փողոցային մրցարշավի ժամանակ իր մեքենայով վրաերթի ենթարկելու արդյունքում երկու հոգու սպանելու եւ մեկին վիրավորելու մեջ: Հենրի Մայքլ Գեւորգյանին մեղադրում են սպանության եւ ավտոմայրուղում ավտոմրցարշավի մասնակցելու մեջ, որը հանգեցրել է բախման: Հաջորդ դատալսումը նշանակված է մարտի 11-ին: Մեղավոր ճանաչվելու դեպքում Գեւորգյանին սպառնում է 33 տարուց մինչեւ ցմահ ազատազրկում նահանգի բանտում:
Նշենք, որ Հենրի Մայքլ Գեւորգյանի փաստաբան Քեյթ Հարդին հայտարարել է, որ իր պաշտպանյալը չի եղել վթարի մասնակից Mustang ավտոմեքենայի ղեկին: Նրա խոսքով, մրցարշավի ժամանակ նկարահանված տեսանյութում երեւում է, որ Գեւորգյանը կանգնած է մեկնակետում գտնվող երկու մեքենաների մեջտեղում:
