Գրեթե վստահաբար կարելի է ասել, որ Հայոց ցեղասպանության 100-րդ տարելիցի միջոցառումներին Լեհաստանը չի ներկայանա նախագահի մակարդակով, քանի որ հիշատակի միջոցառումներից երկու շաբաթ անց երկրում նախագահական ընտրություններ են նախանշված: Այս մասին NEWS.am-ի թղթակցի հետ զրույցում հայտարարեց Հայաստանում Լեհաստանի նոր արտակարգ եւ լիազոր դեսպան Եժի Նովակովսկին:
Նրա խոսքով, առայժմ հայտնի չէ, թե ինչ մակարդակով, բայց Լեհաստանն անպայման կմասնակցի Հայոց ցեղասպանության 100-րդ տարելիցի հիշատակի արարողություններին:
«Ես հարցրեցի մեր նախագահին, սակայն նա դիվանագիտորեն պատասխանեց, որ Լեհաստանում նախընտրական քարոզարշավի պատճառով շատ դժվար կլինի Երեւանում ներկա գտնվել միջոցառումներին: Լեհական կողմից դեռեւս հստակ պատասխան չկա այն մասին, թե ով կներկայացնի երկիրը: Եվ, հաշվի առնելով նախընտրական օրակարգը, որոշումը բավական ուշ կընդունվի»,- կարծիք հայտնեց Եժի Նովակովսկին: