Եվրասիական տնտեսական միության անդամ երկրները 2016թ. հնարավորություն կստանան մասնակցել պետական գնումների միասնական համակարգին էլեկտրոնային սակարկությունների միջոցով։ Այս մասին Մինսկում մարտի 20-ին հայտնել է Եվրասիական տնտեսական հանձնաժողովի՝ մրցակցության եւ հակամենաշնորհային կարգավորման հարցերով նախարար Նուրլան Ալդաբերգենովը։

«2016թ. մենք պետք է հասնենք դրան։ Համակարգը պետք է աշխատի։ Այս պահին մենք խնդրի լուծման փուլում ենք գտնվում»,- հայտարարել է նախարարը լրագրողներին։

Նա նշել է, որ միության տարածքում պետք է կազմակերպվի էլեկտրոնային  գնումների հնարավորություն, որպեսզի «օրինակ՝ Մինսկում ապրող գործարարը կարողանա մասնակցել Ռուսաստանում կամ Ղազախստանում ընթացող սակարկություններին եւ հնարավորություն ունենա երկրից դուրս չգալով մասնակցել առեւտրին եւ պայմանագրեր կնքել»,- մեջբերում է «ՌԻԱ Նովոստի»-ն։

Նախարարը ընդգծել է, որ նման համակարգ ստեղծելու համար անհրաժեշտ է շատ տեխնիկական եւ կազմակերպչական բնույթի հարցեր լուծել։