Սպորտի եւ երիտասարդության հարցերի նախկին նախարար, ՀԱՕԿ քարտուղար Հրաչյա Ռոստոմյանը ԲՀԿ-ից դուրս գալու դիմում է գրել: Այս տեղեկությունը NEWS.am-ի թղթակցի հետ զրույցում հաստատեց ԲՀԿ մամուլի խոսնակ Վահան Բաբայանը:
Նա նշեց, որ Հրաչյա Ռոստոմյանը ԲՀԿ-ից դուրս գալու դիմում է գրել ԲՀԿ արտահերթ համագումարի օրը՝ մարտի 5-ին: Անձամբ Հրաչյա Ռոստոմյանը NEWS.am-ի թղթակցի հետ զրույցում տեղին չհամարեց ԲՀԿ-ից դուրս գալու պատճառների մասին հարցը եւ որեւէ մեկնաբանություն այդ թեմայով չարեց:
Ինչ վերաբերում է ԲՀԿ անդամ մյուս նախկին պաշտոնյաններին, ապա կուսակցությունում նրանց մնալ, գնալու մասին տեղեկություն չունեն:
Այսպես, օրինակ՝ հայտնի չէ՝ աշխատանքի եւ սոցիալական հարցերի նախկին նախարար Արթուր Գրիգորյանը, սպորտի եւ երիտասարդության հարցերի նախկին նախարար Արթուր Պետրոսյանը, Գեղարքունիքի նախկին մարզպետ Նվեր Պողոսյանը, նախկին պատգամավորներ Հրատ Մադաթյանը, Արսեն Ավագյանը ԲՀԿ անդամ են, թե ոչ: Վահան Բաբայանն ասաց, որ նրանց դիմում գրելու մասին որեւէ տեղեկություն չունի, իսկ Վայոց Ձորի նախկին մարզպետ Սերգեյ Բագրատյանը շարունակում է մնալ ԲՀԿ անդամ:
Նշենք, որ նախկին պատգամավորներից Նապոլեոն Ազիզյանը եւ Զոհրաբ Զոհրաբյանը համագումարից հետո հայտարարել են ԲՀԿ-ից դուրս գալու մասին: Իսկ Գոհար Ենոքյանը ասել է, որ «ինքը արդեն 4 տարի է չկա էդ խաղերի մեջ, ոչ գնում է, ո’չ գալիս է»:
