Երեւանի Բաշինջաղյան վերելակի պոկվելու հետեւանքով մահացողը 35-ամյա աղջիկ է, նա հյուր էր եկել այդ շենք: Այս մասին NEWS.am-ի թղթակցի հետ զրույցում ասաց Տեխնիկական անվտանգության ազգային կենտրոնի տնօրենի տեղակալ, Երեւան քաղաքի ծառայության պետ Վոլոդյա Հովսեփյանը:
Նա նշեց, որ նախնական տեղեկություններով՝ վերելակի խցիկի վրա հատուկ ամրաններ կան, որից կախվում է ճոպանը, դա կտրվել է, ինչի հետեւանքով վերելակը պոկվել է եւ աղջիկը տեղում մահացել է:
Վոլոդյա Հովսեփյանը նշեց նաեւ, որ այդ վերելակը 2013թ անցել էր փորձաքննություն, թերություններ կային, որոնք վերացրել էին, իսկ 2014թ չէր անցել փորձաքննություն եւ իրավունք չունեին շահագործելու: Իսկ թե ինչու չէր անցել փորձաքննություն, Վոլոդյա Հովսեփյանն ասաց, որ շահագործողը ինքը պետք է դիմի եւ անցնի փորձաքննություն, իսկ դա չանելոււ համար սահմանված է պատասխանատվություն: Վարչության պետի տեղակալը ասաց նաեւ, որ այժմ դեպքի առթիվ տեխնիկական քննություն է իրականացվում եւ մյուս շաբաթվա ընթացքում ավելի մանրամասն կկարողանա անդրադառնալ դրան:
Ավելի վաղ հայտնել էինք, որ մարտի 21-ին, ժամը 13.36-ին ահազանգ է ստացվել, որ Երեւանի Բաշինջաղյան փողոցի 2-րդ նրբանցքի թիվ 1 շենքի վերելակն ընկել է. անհրաժեշտ է փրկարարների օգնությունը:
Դեպքի վայր են մեկնել մեկ մարտական հաշվարկ, ՃԿԿ օպերատիվ խումբը: Դեռեւս չպարզաբանված հանգամանքներում վերելակը պոկվել եւ վայր է ընկել. խցիկում հայտնաբերվել է Ա. Շ.-ի (մոտ 35 տ.) դին: