Եվրասիական տնտեսական միության երկրների համար միասնական մակրոտնտեսական չափանիշներ կազմելու մասին դեռ վաղ է խոսել։ Այս մասին մարտի 21-ին լրագրողներին հայտարարեց «Այլընտրանք» հետազոտական կենտրոնի ղեկավար Թաթուլ Մանասերյանը։
ԵՏՄ անդամ երկրների ՀՆԱ կառուցվածքը շատ տարբեր է։ Չափազանցրած չենք լինի, եթե ասենք, որ նրանց գործնական մշակույթը նույնպես տարբեր է։ Ուստի անհնար կլինի միանգամից միավորել նրանց արժութային, գումարավարկային, հարկաբյուջետային քաղաքականությունները, հավելեց Մանասերյանը։
Ըստ տնտեսագետի՝ սկզբունքորեն ցանկացած ինտեգրացիոն միավորման դեպքում ինտեգրման խորացման պարագայում կարող ենք խոսել ինքնիշխանության կորստի մասին։ Բնականաբար, ԵՄ անդամ երկրները չեն կարող ինքնուրույն մաքսային քաղաքականություն վարել երրորդ երկրների հետ։ Նրանք կորցրել են իրենց ազգային արժույթը, իսկ նրանց Կենտրոնական բանկերը՝ գումարավարկային քաղաքականության մի մասը։ «Սակայն մենք բոլորս գիտենք, թե ինչ ստացան նրանք դրա փոխարեն։ Այդ պատճառով մենք մեր գործընկերների հետ պետք է մտածենք, թե ինչ կարող ենք ստանալ նոր ինտեգրացիոն միավորումից»,- նշել է Մանասերյանը։