Դժվար թե 1915 թվականի իրադարձությունների ճանաչման հարցը փչացնի Բուլղարիայի եւ տեղի հայ համայնքի հարաբերությունները: NEWS.am-ի թղթակցի հետ զրույցում նման կարծիք հայտնեց Եվրախորհրդարանի պատգամավոր, Բուլղարիայի սոցիալիստական կուսակցության անդամ Գեորգի Պիրինսկին:
«Դուք գիտեք, որ Բուլղարիայի եւ հայերի միջեւ բավական սերտ եւ խորը կապեր կան մեր երկիր հայ ժողովրդի մի մասի ներգաղթից հետո: Այդ պատճառով, չեմ կարծում, որ հարցը բացասաբար է անդրադառնում: Բայց այն շարունակում է բաց մնալ բուլղարական հանրության համար»,- հայտարարեց Պիրինսկին:
Հարցին, կարո՞ղ է, արդյոք, բուլղարական խորհրդարանը տեսանելի ապագայում կրկին քվեարկության դնել Հայոց ցեղասպանության ճանաչման մասին բանաձեւը, Պիրինսկին պատասխանեց. «Չգիտեմ, ներկայում դեռեւս տեսանելի չէ, որ նման բան կարող է տեղի ունենալ: Բայց եվրոպական մակարդակով, ինչպես տեսնում եք, ե՛ւ Եվրախորհրդարանում, ե՛ւ Եվրանեսթի խորհրդարանական վեհաժողովում, նման դիրքորոշում ընդունվել է (Հայոց ցեղասպանությունը դատապարտելու մասին բանաձեւ - խմբ.): Իսկ դա նշանակում է, որ հարցը դեռեւս արդիական է»,- հավելեց բուլղարացի պատգամավորը:
Հիշեցնենք, որ Բուլղարիայի խորհրդարանում Հայոց ցեղասպանության ճանաչման մասին բանաձեւը մերժվել է երկու անգամ՝ 2006 եւ 2008 թվականներին, հիմնականում՝ բուլղարական թուրքերի «Հանուն իրավունքի եւ ազատության շարժում» կուսակցության ջանքերի շնորհիվ: