Սիրիահայ գործարարները կառավարությանը խնդրում են 6 ամսով, կամ 1 տարով սառեցնել իրենց վարկային պարտավորությունները, այլապես իրենք ստիպված կլինեն փակել իրենց ընկերությունները: Այս մասին այսօր՝ մարտի 23-ին, լրագրողներին ասացին մի խումբ սիրահայ գործարարներ՝ նշելով, որ այդ խնդրանքով իրենք այսօր նաեւ գրավոր դիմելու են վարչապետին:
«Մեր մեջ մարդիկ կան, որ հայտնվել են սեւ ցուցակներում վարկային պարտավորությունները ժամանակին չկատարելու համար, իսկ նրանք, որոնք ժամանակին են կատարում վարկային պարտավորությունները, իրենց երեխաների բերանից են հացը կտրում: Մեր միակ խնդրանքն է մեր երկրի կառավարությունից, որ մեզ աջակցի, քանի որ մենք փախստական ենք եւ ոչինչ չունենք Հայաստանում, եթե մեզ չօգնեն, մենք փակվելու ենք»,-ասաց սիրահայ ոսկերիչ Միքայել Կարապետը:
Սիրիահայ ոսկերիչը նշեց, որ իրենք արդեն հավաքել են 30 սիրիահայ գործարարի ստորագրություն եւ մինչեւ օրվա մեջ կառավարություն դիմում կներկայացնեն:
Սիրահայ գործարար Հրաչ Բալմանուկյանն էլ նշեց, որ Հայաստանում դժվար է արտադրություն կազմակերպել, քանի որ շուկան փոքր է, եւ ապրանքն էլ կանխիկ չեն կարողանում իրացնել:
«Հիմա բոլորը նիսյա են ուզում, եթե նիսյա չտաս, չես կարող աշխատել, բայց մենք էլ կառավարությունից ենք գումար վերցրել, ո՞նց փակվենք»,- դժգոհեց սիրիահայ գործարարը:
