Անկարայի դատախազությունը հետաքննություն է սկսել Թուրքիայի փոխվարչապետ Բյուլենթ Առընչի եւ Անկարայի քաղաքապետ Մելիհ Գյուքչեքի նկատմամբ։
Թուրքական Milliyet-ի փոխանցմամբ՝ ընդդիմադիր «Ժողովրդա-հանրապետական» (CHP) կուսակցության մի շարք պատգամավորների, Անկարայի ճարտարապետների պալատի եւ «Ժողովրդի փրկության» կուսակցության կողմից դատախազություն ներկայացրած բողոքների հիման վրա Անկարայի դատախազությունը հետաքննություն է սկսել փոխվարչապետի եւ Անկարայի քաղաքապետի դեմ։
Նշվում է, որ Անկարայի քաղաքապետի դեմ հետաքննություն է սկսվել պաշտոնը չարաշահելու, իսկ փոխվարչապետի դեմ՝ հանցանքի մասին իմանալու եւ լռելու մեղադրանքներով։
Եթե հետաքննության ժամանակ Անկարայի քաղաքապետի գործունեության մեջ հանցանքի տարր հայտնաբերվի, ապա նրան պատասխանատվության ենթարկելու համար անհրաժեշտ է ՆԳ նախարարության թույլտվությունը, իսկ փոխվարչապետի դեպքում պետք է խորհրդարանը հավանություն տա նրան պատասխանատվության ենթարկելու համար։
Նշենք, որ Թուրքիայի փոխվարչապետ Բյուլենթ Առընչը քննադատել էր Թուրքիայի նախագահ Էրդողանին քրդական հարցի հետ կապված եւ շեշտել, որ նախագահի լիազորության մեջ չի միտնում միջամտել կառավարության գործերին։ Այս հայտարարությունից հետո Անկարայի քաղաքապետը կոչ էր արել Բյուլենթ Առընչին հրաժարական տալ։ Բյուլենթ Առընչը չի հանդարտվում եւ Անկարայի քաղաքապետին մեղադրում է ապօրինություններ իրականացնելու մեջ եւ նրան անպատիվ անձ անվանում։
Թեեւ Բյուլենթ Առընչը, թե Անկարայի քաղաքապետ Մելիհ Գյոքչեը հանդիսանում են Էրդողանի ստեղծած «Արդարություն եւ զարգացում» կուսակցության անդամներ։