ԼՂՀ ՊԲ-ն տեսանյութ է պատրաստել հակառակորդի դիվերսիոն խմբի ոչնչացման մասին, որը ցուցադրվել է «Արցախ TV»-ի եթերում:

Տեսանյութում հայ սպան պատմում է, որ հակառակորդը փախուստի դիմելիս այնպիսի խուճապի վիճակում է եղել, որ գրոհայիններից մեկը պայթել է ականի վրա, կորցրել են համազգեստի նմուշներ:

«Մենք հակառակորդի փախչող խմբին հասել ենք իրենց դիրքերի մատույցներում եւ դիվերսիոն հետախուզական խումբը լիովին ջախջախվել է»,-պատմել է նա:

«Հետապնդել ենք մինչեւ իրենց սահմանը, հայտնաբերեցինք խմբին ու բոլորին տեղում ոչնչացրինք»,-ասել է գործողությանը մասնակցող սպաներից մեկը:

Ադրբեջանցիներն իրենց դիակները մարտադաշտից քարշ տալով հանել են միայն երեկոյան, այն էլ թիկունքից օգնության հասած մեծ ուժերի միջոցով:

Հիշեցնենք, որ մարտի 19-ին՝ ժամը 08:30-ի սահմաններում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված դիրքերի վրա: Շուրջ երկու ժամ տեւած մարտական գործողության արդյունքում դիրքապահ անձնակազմը եւ օգնության հասած ուժերը ստիպել են հակառակորդին մատնվել փախուստի, այնուհետեւ հետապնդելով վերջիններիս, ամբողջությամբ ոչնչացրել են խմբին` իրենց դիրքերի մատույցներում:

Ցավոք, հակառակորդին դիմագրավելու ժամանակ արիաբար զոհվել են ՊԲ զինծառայողներ Հակոբ Գագիկի Խաչատրյանը (1996թ.), Էդուարդ Գագիկի Հայրապետյանը (1995թ.) եւ Արշակ Կարենի Հարությունյանը (1995թ.), Պաշտպանության բանակի եւս 4 զինծառայողներ վիրավորվել են:

Ավելի մանրամասն տեսանյութում: