2015թ. Համաշխարհային բանկի խմբի անդամ IFC-ի, ՀՀ Էկոնոմիկայի նախարարության եւ Հայաստանի զարգացման հիմնադրամի միջեւ այսօր ստորագրվել է պայմանագիր, որի համաձայն նախատեսվում է կողմերի համագործակցությունը ներդրումային քաղաքականության բարելավման եւ ստուգումների համակարգի բարեփոխման ոլորտներում: Ծրագիրը նպատակ ունի խթանել ներդրումները, նպաստել գործարար ծախսերի նվազեցմանը, մասնավոր հատվածի աճին եւ աշխատատեղերի ստեղծմանը:
Համաշխարհային բանկի խմբի անդամ IFC-ն իր՝ «Հայաստանում ներդրումային միջավայրի բարեփոխումներ» ծրագրի շրջանակներում ՀՀ կառավարությանը եւ Հայաստանի զարգացման հիմնադրամին կտրամադրի խորհրդատվություն՝ ներդրումային միջավայրը բարելավելու եւ տեսչական համակարգը ավելի կանխատեսելի ու արդյունավետ դարձնելու գործում:
ՀՀ էկոնոմիկայի նախարար Կարեն Ճշմարիտյան ասաց. «Վերջին տարիներին Հայաստանը նշանակալի արդյունքներ է արձանագրել ներդրումային միջավայրի բարեփոխումների իրականացման ուղղությամբ: Սակայն դեռեւս շատ են անելիքները, եւ մենք առանձնակի կարեւորում ու գնահատում ենք IFC-ի օժանդակությունը Հայաստանին՝ մի շարք երկրներում կիրառվող ներդրումների խրախուսման, գործարարության պարզեցված ու արդյունավետ կանոնակարգերի ներդրման հարցերում խորհրդատվություն, ինչպես նաեւ գործնական օժանդակություն տրամադրելու համար»:
Համատեղ ջանքերով նախատեսվում է մշակել միջոցառումների ծրագիր, որը կոչված է լինելու խրախուսել եւ պահպանել ներդրումները Հայաստանի տարածքում, խթանել արտահանումը գյուղատնտեսության ոլորտում, վստահելի միջավայր ստեղծել օտարերկրյա ներդրողների համար եւ պարզեցված հարկային քաղաքականություն՝ գյուղատնտեսության ոլորտի համար: Տեսչական ստուգումների բարեփոխված համակարգը կնվազեցնի ստուգումների քանակը ցածր ռիսկայնության բիզնեսների համար՝ խնայելով նրանց ժամանակը եւ միջոցները:
Ինչպես նշեց IFC- ի Հարավային Կովկասի տարածաշրջանային նոր ղեկավար՝ պարոն Յան Վան Բիլսենի «Մեր համագործակցության նպատակն է ներդնել թափանցիկ եւ բիզնեսի համար հասկանալի կանոնակարգերը՝ միաժամանակ ապահովելով հանրային շահերի պաշտպանությունը: Կատարվող աշխատանքը հանդիսանում է Համաշխարհային բանկի խմբի կողմից իրականացվող ծրագրերի մի մաս, որը նպատակ ունի Հայաստանում ստեղծել ավելի մրցունակ ներդրումային միջավայր, ինչը կխթանի երկրի տնտեսական եւ սոցիալական զարգացումը»:
IFC –ի «Հայաստանում ներդրումային միջավայրի բարեփոխումներ» ծրագիրն իրականացվում է Համաշխարհային բանկի խմբի Առեւտրի եւ մրցունակություն դեպարտամենտի կողմից, եւ ֆինանսավորվում է Ավստրիայի դաշնային ֆինանսների նախարարության եւ Հունգարական գործընկերության ֆինանսավորման շրջանակներում (Հունգարիայի EXIM Բանկի համագործակցությամբ): Այս ծրագիրը հիմնվում է ներդրումային միջավայրի բարել ավմանն ուղղված IFC –ի նախորդ ծրագրի նվաճումների վրա (2011-2014թթ.), որի շրջանակներում ՀՀ կառավարությանը տրամադրվել է աջակցություն իրականացնել մի շարք բարեփոխումներ՝ հարկային, արտաքին առեւտրի, տեսչական ստուգումների եւ սննդի անվտանգության ոլորտներում:
Այն պահից, երբ 1995թ. Հայաստանը դարձավ IFC-ի անդամ, IFC-ն ներդրել է 320 մլն. դոլար 52 ծրագրի իրականացման համար արդյունաբերության ողջ տիրույթում, այդ թվում ֆինանսական շուկաների, արտադրության եւ հանքարդյունաբերության ոլորտներում: IFC-ի խորհրդատվական ծառայություններն իրականացվում են ծրագրերի միջոցով, որոնք ուղղված են սննդամթերքի անվտանգության ապահովման գործընթացներին, ֆինանսական հատվածին, կայուն էներգետիկային եւ կանոնակարգման դաշտի պարզեցմանը:
