Շվեդիայի առաջնության 3-րդ դիվիզիոնում ելույթ ունեցող «Դալքուրդ» ֆուտբոլային ակումբը վերջին պահին մտափոխվել էր թռչել Germanwings ավիաընկերության այն օդանավով, որը կործանվել էր Ֆրանսիայում։ Այս մասին գրում է AFP-ն։
«Դալքուրդը» Բարսելոնից տուն վերադառնալու համար 4U9525 չվերթով թռչող ինքնաթիռի տոմսեր էր պատվիրել, որպեսզի Դյուսելդորֆից տարանցիկ չվերթով մեկներ Շվեդիա։ Սակայն հասնելով օդանավակայան՝ թիմը որոշել էր, որ Դյուսելդորֆում վայրէջքը շատ երկար ժամանակ կարող է խլել եւ չեղյալ էր համարել պատվերը։ Դրա փոխարեն Շվեդիայի քրդական համայնքը ներկայացնող թիմը որոշել էր օգտվել Ցյուրիխով եւ Մյունխենով թռչող չվերթներից։ «Բոլոր նրանց համար, ովքեր փորձում են կապ հաստատել մեզ հետ, տեղեկացնում ենք, որ մեզ հետ ամեն բան կարգին է, մենք տանն ենք։ Դա ուրիշ օդանավ է եղել։ Աստված թող նրանց հոգիները լուսավորի»,- իր Twitter-ում գրել է ակումբի դարպասապահ Ֆրանկ Պետերսոնը, տեղեկացնում է «ՌԻԱ Նովոստի»-ն։
Germanwings բյուջետային ավիաընկերության Airbus A-320 ինքնաթիռը կործանվել էր Ֆրանսիական Ալպերի դժվարամատչելի տեղանքում։ Օդանավում եղել է 148 ուղեւոր եւ անձնակազմի 8 անդամ։ Ֆրանսիայի նախագահ Ֆրանսուա Օլանդը հայտարարել է, որ նրանք բոլորը, ամենայն հավանականությամբ, զոհվել են։