ԱՄՆ Կոնգրեսի Ներկայացուցիչների պալատի ավելի շատ անդամներ են միանում Հայոց ցեղասպանության շուրջ ճշմարտության եւ արդարության գլոբալ կոչին. բանաձեւի նախագծի աջակիցների թիվը շարունակում է աճել:
«Asbarez» պարբերականը, հղում կատարելով ԱՄՆ Հայ դատի հանձնախմբին, գրում է, որ Ներկայացուցիչների պալատի երկու կուսակցությունները ներկայացնող տարբեր հանձնախմբերի առաջնորդներ են միացել բանաձեւի նախագծի (H. Res. 154) ավելի քան 45 կողմնակիցներին:
«Սա այն Ցեղասպանությունն է, որը ճանաչել են սենատոր Բարաք Օբաման, սենատոր Քերրին, որը ճանաչել եւ որի մասին գիրք է գրել ՄԱԿ-ում դեսպան Փաուերը: Ժամանակն է, որպեսզի ե՛ւ օրենսդիր, ե՛ւ գործադիր իշխանությունները նույնն անեն: Մենք պետք է Թուրքիայի կառավարությանը ցույց տանք, որ չի կարող անտեսել պատմությունը, քանի որ Հայոց ցեղասպանության ժխտումը ոչ միայն ցեղասպանության վերջին քայլն է, այլ հաջորդ ցեղասպանության առաջին քայլը»,- հայտարարել է Ներկայացուցիչների պալատի արտաքին հարաբերությունների հանձնաժողովի անդամ Բրեդ Շերմանը:
Ավելի վաղ NEWS.am-ը տեղեկացրել էր, որ մարտի 18-ին Վաշինգտոնում Հայոց ցեղասպանության շուրջ ճշմարտության եւ արդարության բանաձեւի նախագիծ է ներկայացվել: Փաստաթուղթը ներկայացնելիս ելույթ են ունեցել կոնգրեսականներ Ռոբերտ Դոլդը, Ադամ Շիֆը, Դեւիդ Վալադաոն, Ֆրենկ Փալոնեն եւ հայ համայնքի ներկայացուցիչներ: Բանաձեւն ԱՄՆ նախագահ Բարաք Օբամային կոչ է անում աշխատել Հայաստանի եւ Թուրքիայի միջեւ ազնիվ, կառուցողական եւ ամուր հարաբերությունների հաստատման շուրջ՝ Թուրքիայի կողմից Հայոց ցեղասպանության փաստերի եւ հետեւանքների հիման վրա:
