Ադրբեջանի հետ շփման գիծը հատած զինվորը խնդիրներ է ունեցել ընտանիքում։ Այդ մասին խորհրդարանում հայտնել է պաշտպանության նախարար Սեյրան Օհանյանը։ Նրա խոսքով, դա ծառայողական քննության նախնական եզրակացությունն է։
«Պատճառը պետք է փնտրել նրա ընտանեկան հանգամանքներում։ Ցանկացած դեպքում, ծառայողական քննություն եւ քրեական գործ է հարուցվել։ Ամեն ինչ կպարզվի նրա ընտանիքի եւ մտերիմների, ռազմական ստորաբաժանման անձնակազմի օգնությամբ»,- նշել է նախարարը։
Նախարարի խոսքով, եթե զինվորի վրա ճնշում եղել է, ապա միայն ընտանիքում։ «Սպաների կողմից միջանձնային հարաբերությունների խախտումը ես բացառում եմ, քանի որ նա պայմանագրային էր եւ ծառայում էր առանձին ստորաբաժանումում, որտեղ նման խախտումները շատ քիչ են լինում»,- ասել է Օհանյանը։
Նշենք, որ ԼՂՀ ԶՈՒ պայմանագրային Անդրանիկ Գրիգորյանը (1991թ. ծնվ.) մարտի 22-ին անցել էր ադրբեջանական կողմը։