Ֆրանսիայի նախագահ Ֆրանսուա Օլանդը կարծում է, որ Ուկրաինայում խաղաղության հաստատումը կնպաստի ԵՏՄ-ի հետ հարաբերությունների զարգացմանը։ Այս մասին ֆրանսիացի նախագահը հայտարարել է Ղրղզստանի նախագահ Ալմազբեկ Աթամբաեի հետ ունեցած հանդիպման ավարտին։
Աթամբաեւի եւ Օլանդի միջեւ բանակցություններն ընթացել էին մարտի 25-ի երեկոյան Փարիզում։ Նշենք, որ ղրղըզ առաջնորդը աշխատանքային այցով շրջագայում է Եվրոպայում։
«Մենք երկար քննարկել ենք իրավիճակը Կենտրոնական Ասիայում, քննարկել ենք նաեւ իրավիճակն Ուկրաինայում։ Մենք ցանկանում ենք, որպեսզի Ուկրաինայում խաղաղությունը իրատեսական լինի, որպեսզի միջոցներ ձեռնարկվեն Եվրամիության եւ Եվրասիական տնտեսական միության միջեւ հարաբերությունների զարգացման համար։ Ցանկանում ենք, որ մի շարք հարցեր դրական լուծումներ ստանան, դրանց թվում՝ Ուկրաինայի խնդիրը»,-ճեպազրույցի ժամանակ հայտարարել է նախագահ Օլանդը, տեղեկացնում է «ՌԻԱ Նովոստի»-ն։
Իր հերթին Աթամբաեւը նշել է, որ երկու երկրների նախագահները քննարկել են Ղրղզստանի ԵՏՄ-ին անդամակցելու հարցը։ Քննարկման ժամանակ Ֆրանսիայի նախագահ Օլանդը նշել է, որ Ղրղզստանը Մաքսային միությանն անդամակցելուց հետո ավելի շատ հնարավորություններ կունենա ԵՄ-ի հետ տնտեսական հարաբերությունների բարելավման համար։
