Թումանյան 25 հասցեի բնակիչները փոխհատուցում չեն ուզում. նրանք պատրաստվում են ամեն գնով պահպանել իրենց պատկանող գույքը: Այս մասին այսօր՝ մարտի 26-ին, Թումանյան 25 հասցեում հյուրանոցային համալիր կառուցելու նպատակով գույքը բացառիկ՝ գերակա շահ ճանաչելու մասին Հանրային Խորհրդի քննարկմանն ասաց այդ հասցեի բնակիչ Դավիթ Եղիազարյանը:
«2 ամիս առաջ ծանուցում ստացանք, որ հյուրանոց են կառուցելու մեր շենքի փոխարեն: Շենքում բնակվող 8 ընտանիքով ծանուցումը ստանալուց հետո պանիկայի մեջ ընկանք: Եթե մեր շենքի շրջակայքը մխտրել են՝ Հյուսիսային պողոտան կառուցելով, չի նշանակում, որ Թումանյան 25 հասցեի շենքն էլ պետք է քանդեն՝ մնացած շենքերին համահունչ հյուրանոց կառուցելու համար: Փոխհատուցման մասին չենք էլ ուզում մտածել, որովհետեւ վստահ ենք, որ համարժեք փոխհատուցում չի էլ լինելու: Թող շենքը մեկ հարկով բարձրացնեն, եթե ուզում են համահունչ դարձնել մյուս շենքերին»,- ասաց բնակիչը:
Երեւանի քաղաքապետարանի ներկայացուցիչ Արբագ Վարդանյանը նշեց, որ Թումանյան 25 հասցեում հյուրանոց կառուցելը պայնանավորված է քաղաքաշինության խնդիրների կարգավորմամբ:
«Տերյան փողոցից մինչեւ Մաշտոց ընկած հատվածը Հյուսիսային պողոտայի կառուցումից հետո ձեռք բերեց ուրույն տեսք եւ այդ տարածքում միայն այս շենքն է, որը երկհարկանի է եւ համահունչ չէ այդ տարածքին: Քաղաքապետարանը կարծում է, որ այդ շենքի փոխարեն միջին հարկային հյուրանոցի կառուցումը մայրաքաղաքում կխթանի տուրիզմի զարգացումը»,-ասաց Վարդանյանը:
Քննարկմանը մասնակցող՝ Հանրային Խորհրդի անդամ Կարինե Դանիելյանը նշեց, որ երբ Հյուսիսային պողոտան կառուցվեց, պատմական ժառանգության բազմաթիվ օբյեկտներ ոչնչացվեցին:
«Հսկա մոնստեռներն անիմաստ շարվեցին այդտեղ եւ հիմա դա հիմք ընդունելով՝ պատմական շենքը վերացնում եք՝ անվանելով գերակա շա՞հ: Օլիգարխի շահը հանրային գերակա շահ չի կարող լինել»,-ասաց Դանիելյանը:
Ճարտարապետ Գրիգոր Ազիզյանի կարծիքով էլ՝ հյուրանոցի կառուցումը քաղաքաշինական խնդիր չէ, այլ իրավաբաննական.
«Թումանյան 25 շենքում սեփականություն ունի նաեւ «Ռենշին» ՍՊԸ-ն, որը ցանկանում է այդ շենքի փոխարեն հյուրանոց կառուցել, բայց չէ՞ որ այս շենքն ունի նաեւ այլ բնակիչներ, որոնք համաձայն չեն այդ որոշման հետ: Հանրային գերակա շահը նշանակում է բոլոր կողմերի համար շահավետ որոշում, բայց այստեղ հակառակ պատկերն է: Եթե ուզում եք, որ այս շենքը համահունչ լինի այդ տարածքի մյուս շենքերի հետ, առաջարկում եմ շենքը մի քանի հարկ բարձրացնել»,-նշեց Ազիզյանը:
«Ռենշին» ՍՊԸ-ի տնօրեն Էդուարդ Մարությանն էլ նշեց, որ մեկ շաբաթից «Ռենշինը» Թումանյան 25 հասցեի բնակիչներին ֆինանսական փոխհատուցման առաջարկով է դիմելու.
«Մենք վատ բան չենք փորձում անել, ընդամենը հյուրանոց ենք կառուցելու, մեր քաղաքին օգուտ տալու համար»,-ասաց Մարությանը:
Քննարկումը տեւեց մոտ 1 ժամ, կողմերն այդպես էլ ընդհանուր հայտարարի չեկան։