Սորբոնի մեծ ամֆիթատրոնում հանդիսավորապես բացվել է «Հայոց ցեղասպանությունն Օսմանյան կայսրությունում Մեծ պատերազմի տարիներին. հետազոտությունների 100 տարի» միջազգային գիտաժողովը՝ նախագահ Ֆրանսուա Օլանդի հովանավորությամբ։

Ինչպես գրում է «Nouvelles d'Arménie»-ն, եռօրյա միջոցառմանը մասնակցելու են 70 գիտնականներ՝ աշխարհի տարբեր երկրներից։

Ֆրանսիայի ազգային կրթության եւ գիտության նախարար Նաջաթ Վալլո-Բելքասեմը ելույթ է ունեցել՝ բացելով գիտաժողովը։ Խոսելով Հայոց ցեղասպանության մասին՝ նա նշել է, թե «աղբյուրների, կենդանի մնացածների վկայությունների եւ փաստաթղթերի մանրազննին ուսումնասիրությունը թույլ տվեց պարզել իականությունը, որն այլեւս կասկածներ չի հարուցում գիտական հանրության շրջանում»։ «Դա նույնպես Ֆրանսիային մղեց գիտակցման, որ ժխտումն անթույլատրելի է, քանի որ իրավունքն այն է, ինչ պաշտպանում է բոլոր տեսակի մանիպուլյացիաներից»։

Ընդգծելով, որ հայ մտավորության ներկայացուցիչները համառորեն պայքարել են ճշմարտության համար՝ իրենց ստեղծագործությունների եւ գրքերի միջոցով, նախարարը շնորհակալություն է հայտնել նաեւ թուրք մտավորականներին՝ հրատարակիչ Ռագըփ Զարաքօլուին, փաստաբան Ֆեթհիե Չեթինին եւ քաղաքագետ Բուշրա Էրսանլիին։

Նախարարը նաեւ նշել է, թե ուղեկցելու է նախագահ Օլանդին Երեւան այցի ժամանակ։