Գյումրիում սպանված Հարություն Գրիգորյանի ընտանիքի շահերը ներկայացնող  Լիպարիտ Սիմոնյանը համաձայն չէ փորձաքննության եզրակացությանը, որի  համաձայն՝ սպանության մեջ մեղադրվող Արման Կատունյանը դեպքի պահին գտնվել է հոգեբանական աֆեկտի վիճակում: Այս մասին NEWS.am-ին ասաց փաստաբանը:

«Ես ԶԼՄ-ներից եմ տեղեկացել դատահոգեբանական-դատահոգեբուժական համալիր փորձաքննության եզրակացության եւ Արման Կատունյանի խափանման միջոցը փոխելու վերաբերյալ որոշման մասին: Ինքս բողոքարկել եմ եւ քննիչի, եւ փորձագետի գործողությունները, քանի որ համաձայն չեմ ոչ եզրակացության, ոչ էլ կալանքը փոխելու որոշմանը: Միայն մի բան կասեմ. փորձագետը ասել է, որ հոգեբանական աֆեկտի տակ է գտնվել Արման Կատունյանը, բայց եթե մարդը ապօրինի զենքով գնում է հանդիպման, ուրեմն նրա մտքում եղել է կրակելը: Հետեւաբար, ի՞նչ աֆեկտի վիճակում գտնվելու մասին է խոսքը»,- ասաց փաստաբանը:

Նրա խոսքով՝ փորձագետի եզրակացությունը սուբյեկտիվ է:

Նշենք, որ ստացված եզրակացության հիման վրա ՊՆ Շիրակի մարզի Ռազմական ոստիկանության քրեական հետախուզության բաժնի պետ Արման  Կատունյանին առաջադրված մեղադրանքը փոխվել է, նրան մեղադրանք է առաջադրվել ՀՀ քրեական օրենսգրքի 105-րդ հոդվածով եւ 235-րդ հոդվածով: Հիշեցնենք, որ մինչ այդ մեղադրանք էր առաջադրվել ՀՀ ՔՕ 104 հոդվածի 1-ին եւ 235 հոդվածի 1-ին մասերով (ապօրինաբար, դիտավորությամբ մեկ ուրիշին կյանքից զրկելը եւ ապօրինի զենք կրելը):

Ավելի վաղ NEWS.am-ը հայտնել էր, որ Շիրակի մարզում 2014թ. hուլիսի 24-ին ժամը 16:00-ի սահմանում, Գետք համայնքի չօգտագործվող ֆերմաներից մեկի տարածքում գտել էին Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային տարբեր վնասվածքով։