ԼՂՀ կառավարությանն առընթեր քաղավիացիայի վարչության պետ, ԽՍՀՄ վաստակավոր օդաչու Դմիտրի Աթբաշյանը չի հավատում «խելագար օդաչուի» վարկածին, որը, ըստ շրջանառվող լուրերի, А 320 ինքնաթիռի կործանման պատճառ է դարձել:
«Ես չեմ հավատում վարկածին, որ օդանավի կործանման պատճառը երկրորդ օդաչուն է: Կարծում եմ՝ պատճառներն ավելի շուտ պետք է փնտրել օդանավի թերություններում: Չէ՞ որ սա առաջին դեպքը չէ, եւ նման խնդիրները Սոչիում ինքնաթիռի կործանման պատճառ դարձան»,- նշեց Դմիտրի Աթբաշյանը՝ հավելելով, որ խոսքը չլուծվող խնդիրների մասին է՝ կապված աէրոդինամիկ բնութագրերի եւ ավտոմատացված կառավարման հետ:
Համեմատության համար նա նշեց հին, բայց ավելի հուսալի «Տու»-երի առավելությունը՝ ի տարբերություն ժամանակակից, բայց մշակման առումով դրանց զիջող А 320-երի:
Նշենք, որ խելագար երկրորդ օդաչուի մասին վարկածն ավիաընկերությանն եւ արտադրող ընկերությանն ազատում է տեխնիկական թերությունների հետաքննության անհրաժեշտությունից: Հակառակ դեպքում, ընկերությունները ստիպված կլինեին հսկայական միջոցներ ծախսել՝ աղետի պատճառները պարզելու համար:
Գերմանական Germanwings-ի Airbus A320 ուղեւորատար ինքնաթիռը կործանվել է մարտի 24-ին, ֆրանսիական Ալպերի դժվար հասանելի շրջանում: Օդանավում 150 մարդ է եղել:
Հետաքննության տվյալների համաձայն, ինքնաթիռը կարող էր կանխամտածված կործանման տանել երկրորդ օդաչու Անդրեաս Լուբիցը: