Գերմանական Lufthansa ավիաընկերությունը կարող է մինչեւ 50 հազար եվրո վճարել Ֆրանսիայի հարավում կործանված Airbus A320 օդանավի զոհված ուղեւորների հարազատներին, որպես անհապաղ ֆինանսական օգնություն:
«Lufthansa-ն առաջարկել է մինչեւ 50 հազար եվրո հատկացնել», հաղորդում է «ՌԻԱ նովոստին»՝ վկայակոչելով Reuters-ը:
Հիշեցնենք, որ Բարսելոնայից Դյուսելդորֆ թռչող Airbus A-320 օդանավը կործանվել է մարտի 24-ին, ֆրանսիական Ալպերում: Օդանավում եղել է 150 մարդ, որոնք բոլորը մահացել են:
Նրանցից 69-ը Գերմանիայի քաղաքացի էին, 45-ը՝ Իսպանիայի, կայնի նաեւ ԱՄՆ-ի, Ավստրալիայի, Արգենտինայի, Իրանի, վենեսուելայի, Կոլումբիայի, Մեքսիկայի, Ճապոնիայի, Ղազախստանի, Իսրայելի, Դանիայի, Նիդերլանդների եւ Բելգիայի քաղաքացիներ:
Նախնական տվյալներով, աղետի պատճառն այն է, որ երբ անձնակազմի հրամանատարը մի քանի րոպեով դուրս է եկել օդաչուների խցից, երկրորդ օդաչու Անդրեաս Լյուբիցը փակվել է ներսում եւ դիտավորյալ իջեցրել օդանավը: Քննությունը պարզել է, որ վերջինս հոգեկան խնդիրներ է ունեցել, որոնք թաքցրել է ավիաընկերությունից: