Գյումրիում խորթ հորը՝ ազգությամբ քուրդ, Թուրքիայի քաղաքացի Էվիլիա Գյուլիշթեքինի սպանության գործով նոր դատավոր է նշանակվել Վարդան Գրիգորյանը: Այս մասին NEWS.am-ին ասաց գործով մեղադրյալ, ազգությամբ եզդի 24-ամյա Մաքսիմ Բաքոյանի փաստաբան Մամիկոն Մուրադյանը:

Նա հայտնեց, որ դատավորը 12-օրյա ժամկետում կծանոթանա նյութերին եւ դատական նիստի օրը կնշանակի:

«Դատավորի փոխվելը նշանակում է, որ դատաքննությունը նորից պետք է սկսենք, թեեւ նախորդ դատավորը՝ Մարտին Սարոյանի ժամանակ էլ որեւէ էական բան չի եղել, միայն դատավարության կողմերին ենք ծանոթացել: Բացի դրանից՝ տուժողի իրավահաջորդի ներկայացուցչի՝ նիստերին մասնակցելուց հրաժարվելն էլ ինքնին դատավարությունը մի քիչ կձգձի»,- ասաց փաստաբանը:

Նշենք, որ այս գործով դատավորը Մարտին Սարոյանի լիազորությունները Հայաստանի նախագահ Սերժ Սարգսյանը մարտի 16-ին դադարեցրել է:

Հիշեցնենք, որ ազգությամբ եզդի Մաքսիմ Բաքոյանի մորը՝ Մայա Բաքոյանին, 2013թ. Թուրքիայում սպանել էր ամուսնու՝ ազգությամբ քուրդ Էվիլիա Գյուլիշթեքինի եղբայրը՝ կնոջ 4 տարեկան որդու աչքի առջեւ հրազենային մահացու վնասվածք հասցնելով հարսին: Մաքսիմը, որը մինչեւ այդ Գերմանիայում էր ապրում, վերադարձել էր Գյումրի եւ իր երկու հարազատ քույրերի, խորթ հոր եւ նրա 2 զավակների հետ ապրում էր Գյումրիում: 2014թ. մարտի 15-ին նա դանակահարելով սպանել էր խորթ հորը։ Սպանությանն ականատես էր եղել Մաքսիմի մորաքույրը, որը NEWS.am-ին պատմել էր, որ Մաքսիմը դանակը մտցրել է խորթ հոր սիրտը, երբ վերջինն ասել է, որ Թուրքիա է գնալու՝ նրա մոր արյան փողը վերցնելու: Մաքսիմը, ըստ մորաքրոջ, խորթ հոր խոսքերից ենթադրել էր, որ նրա պատվերով է եղբայրը սպանել իր մորը եւ որոշել է վրեժ լուծել: Մաքսիմ Բաքոյանին մեղադրանք է առաջադրվել ՔՕ 104-րդ հոդվածի 1-ին մասի հատկանիշներով։