Կաշառք վերցնելու մեջ մեղադրվող Լոռու մարզի ընդհանուր իրավասության դատարանի դատավոր Խաչատուր Խաչատրյանի գործով նախաքննությունն ավարտվում է: Այս մասին NEWS.am-ի թղթակցի հետ զրույցում ասաց փաստաբան Կարեն Թումանյանը:
Նա նշեց, որ նախաքննությունը երեւի մինչեւ ամսվա վերջ կավարտվի, գործը կուղարկեն դատարան: Մինչ օրս դատավորը ցուցմունք չի տվել, նա դա կանի դատարանում: Փաստաբանից տեղեկացանք նաեւ, որ քրեական գործ են հարուցել նաեւ կաշառք տվողի՝ «Զոսեկար» ՍՊԸ տնօրեն Սեյրան Կարապետյանի դեմ:
Հիշեցնենք, որ դեկտեմբերի 25-ին ՀՀ Ազգային անվտանգության ծառայության իրականացրած օպերատիվ-հետախուզական միջոցառումների արդյունքում կաշառք ստանալու պահին ձերբակալվել է ՀՀ Լոռու մարզի ընդհանուր իրավասության դատարանի դատավոր Խ. Խաչատրյանը: ՀՀ ԱԱԾ քննչական վարչությունում հարուցվել է քրեական գործ ՀՀ Քր.օրի 311 հոդվածի 4-րդ մասի 2-րդ եւ 3-րդ կետի հատկանիշներով: Կատարվում է նախաքննություն: ՀՀ գլխավոր դատախազ Գ. Կոստանյանն այսօր ՀՀ դատական օրենսգրքի 168-րդ հոդվածով նախատեսված կարգով ՀՀ Լոռու մարզի ընդհանուր իրավասության դատարանի դատավոր Խ. Խաչատրյանին որպես մեղադրյալ ներգրավելու վերաբերյալ միջնորդություն է ներկայացրել Արդարադատության խորհուրդ, որը բավարարվել է: Դատավորը կալանավորված է: