«Նուբարաշեն» ՔԿՀ-ի մոտ հնչած կրակոցների գործով կալանավորված Գաստիկը՝ Վահան Հակոբյանը, բազմաթիվ մարմնական վնասվածքներ ունի: Այս մասին հայտնեցին NEWS.am-ի աղբյուրները:
Չի բացառվում, որ դրանք կապված լինեն սպանությանը նախորդած դեպքերի հետ, քանի որ լրատվամիջոցներում տեղեկություններ էին շրջանառվում, թե Գաստիկին հալածել են, մեքենա վարել նրա ոտքերի վրայով եւ այլն: Մեր աղբյուրները հայտնեցին, որ գործի շրջանակներում նշանակված են մի շարք փորձաքննություններ, օրինակ՝ դատաբժշկական փորձաքննություն է նշանակված Գաստիկի, Ծգլի եւ Տլեի նկատմամբ: Նրանք չեն ընդունում իրենց առաջադրված մեղադրանքը եւ իրենց մեղավոր չեն ճանաչում:
Գաստիկի, Ծգլի եւ Տլեի փաստաբան Լուսինե Սահակյանը NEWS.am-ի թղթակցի հետ զրույցում ասաց, որ չի ցանկանում մեկնաբանել մեզ հասած լուրերը: Նա միայն նշեց, որ մյուս շաբաթ կբողոքարկի խափանման միջոց կալանքը ընտրելու հարցը:
Հիշեցնենք, որ մարտի 4-ին, ժամը 13։59-ին ոստիկանությունը ահազանգ է ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ, ճանապարհին նրանք մահացել են։ Նախնական տեղեկություններով՝ մի քանի հոգի կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ:
Կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Նազարյանցը, մահացել է տեղում՝ ՔԿՀ-ի ավտոկայանատեղիում, որտեղ տեղի է ունեցել դեպքը։
Դեպքի առնչությամբ Քննչական կոմիտեում քրեական գործ է հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով: Ոստիկանությունը մարտի 12-ին հետախուզում էր հայտարարել ՀՀ քրեական օրենսգրքի 104 եւ 235 հոդվածների հատկանիշներով մեղադրվող 1986 թ. ծնված Սարգիս Գրիգորյանի (մականունը՝ Ծգլ), 1984 թ. ծնված Սարգիս Հախանումյանի (մականունը՝ Տլե) եւ 1984 թ. ծնված Վահան Հակոբյանի (մականունը՝ Գաստիկ) նկատմամբ: Նրանք 11 օր հետախուզման մեջ գտնվելուց հետո ինքնակամ ներկայացել էին Ազգային անվտանգության ծառայություն: Դատարանը նրանց կալանավորել էր՝ մերժելով կիրառել այլընտրանքային խափանման միջոց գրավը: