Ռուսաստանի Պետդումայի ԱՊՀ հարցերի հանձնաժողովի փոխնախագահ Օլեգ Լեբեդեւը հայտարարել է, որ ռուսական զինծառայող Վալերի Պերմյակովի դատավարությունը կանցկացվի Հայաստանում:
«Ռուսաստանն արեց հնարավոր ամեն ինչ, որպեսզի հետաքննությունն անցկացվի Հայաստանի տարածքում»,- ասել է Լեբեդեւը: Նա հիշեցրել է, որ Պերմյակովը «ռազմական հանցագործություն» է կատարել, որը պատժվում է ռուսական օրենքներով: Օլեգ Լեբեդեւը վստահ է, որ մեղավորն արժանի պատիժ կստանա:
Ավելի վաղ Հայաստանի խորհրդարանի արտաքին հարաբերությունների հանձնաժողովի փոխնախագահ Ալեքսանդր Արզումանյանը խնդրել էր Վալերի Պերմյակովին փոխանցել Հայաստանի իրավազորությանը: ՌԻԱ Նովոստիի փոխանցմամբ, պատգամավորը նշել էր, որ հանցագործությունն իրականացվել է Հայաստանի Հանրապետության տարածքում, այդ պատճառով արդարադատությունը պետք է իրականացվի նույն երկրում:
Հիշեցնենք, որ հունվարի 12-ին Հայաստանում ռուսական ռազմաբազայի զինծառայող, շարքային Վալերի Պերմյակովն առանց թույլտվության լքել էր ծառայությունն ու զենքով դուրս եկել քաղաք: Գյումրիի տներից մեկում նա գնդակահարել էր Ավետիսյանների ընտանիքի 6 անդամի եւ դանակահարել 6 ամսական փոքրիկի, որը նույնպես ավելի ուշ հիվանդանոցում մահացել է:
