Կործանված А320 ինքնաթիռի երկրորդ օդաչու Անդրեաս Լյուբիցի գործողությունները «ոչ կանխամտածված սպանություն» են որակել: Այս մասին հայտարարել է Մարսելի դատախազ Բրիս Ռոբենը:
Հետաքննության ձեռք բերած ապացույցները վկայում են, որ Լյուբիցը Germanwings ավիաընկերությունից թաքցրել է, որ առողջական խնդիրներ ունի: Մարսելի դատախազությունն ավելի վաղ հայտարարել էր, որ օդաչուին կասկածում են ինքնաթիռը մտածված կերպով կործանման տանելու մեջ:
«Մենք գրեթե փոխել ենք որակումը: Ես մտածել եմ այդ մասին, բայց արդյունքում թողեցինք «ոչ կանխամտածված սպանություն» որակումը»,- Provence պարբերականին տված հարցազրույցում ասել է Ռոբենը:
Germanwings ավիաընկերության՝ Բարսելոնայից Դյուսելդորֆ ուղեւորվող Airbus A320 ինքնաթիռը կործանվել է մարտի 24-ին, Ֆրանսիայի հարավ-արեւելյան Ալպ շրջանում: Աղետի հետեւանքով 150 մարդ է զոհվել: Հետաքննության տվյալներով, երկրորդ օդաչու Լյուբիցը, անհայտ պատճառներով, ինքնաթիռը դեպի ներքեւ է ուղղել:
