Այսօր պետական կառույցներից միայն բանակն է ժողովրդի կողքին, և Ապրիլի 24-ին էլ է մեր կողքին լինելու: Այս մասին, այսօր` մարտի 28-ին, Գյումրիի թատերական հրապարակում հրավիրած հանրահավաքի ժամանակ ասաց «Հիմնադիր Խորհրդարանի» նախագահ Ժիրայր Սեֆիլյանը:
«Ռեժիմն ամեն ինչ թալանել է, միայն մի հաստատություն է մնացել` մեր բանակը, որի հետ կարելի է հույս կապել: Միայն բանակն է, որ կարող է մեր ինքնիշխանությանն այսօր տեր կանգնել: Ապրիլի 24-ի կազմակերպվող խաղաղ ցույցը մեր միակ հնարավորությունն է այս իրավիճակից դուրս գալու, այդ օրն ենք որոշել ժողովրդին փողոց հրավիրել, որովհետև, անկախ մեզանից, Ապրիլի 24-ին մեր ժողովուրդը ներքուստ միավորվում է: Այդ օրը պետք է դառնա պետականության պահպանման օր»,- ասաց Ժիրայր Սեֆիլյանը:
Նշենք, որ Գյումրիի թատերական հրապարակում այսօր` մարտի 28-ի, «Հիմնադիր խորհրդարանի» հրավիրած հանրահավաքի ժամանակ միջադեպ է տեղի ունեցել. մի խումբ երիտասարդներ ձվեր են նետել հանրահավաքի մասնակիցների ուղղությամբ, անհայտ անձը դանակահարել է «Հիմնադիր խորհրդարանի» անդամներից Հրաչ Միրզոյանին։ «Հիմնադիր խորհրդարանը» Երեւանից մեկնել էր Գյումրի «Հարյուրամյակն առանց ռեժիմի» շարժման մասին իրազեկման հանրահավաք անցկացնելու։